"É difícil de entender que se conceda un premio de innovación e ao mesmo tempo se negue o carácter innovador da actividade", di o TSXG
"É difícil de entender que se conceda un premio de innovación e ao mesmo tempo se negue o carácter innovador da actividade". Quen así se pronuncia é o Tribunal Superior de Xustiza de Galicia (TSXG) nunha sentenza na que condena a Xunta por non recoñecer a un profesor, entre os méritos que este alegara para acceder a unha praza, dous premios á innovación que lle outorgara a propia Consellería de Educación.
![](https://praza.gal/storage/uploads/doc-d20cb6c.jpeg)
O profesor afectado concorreu a un proceso selectivo de catedráticos de educación secundaria na especialidade de Formación Profesional de organización e procesos de mantemento de vehículos. O proceso contemplaba que "por cada premio de ámbito autonómico, nacional ou internacional ou por cada participación en proxectos de investigación ou innovación no ámbito da educación" o interesado sumaría puntos. E engadíase que eses proxectos premiados puntuaríanse "como proxecto de investigación ou innovación e ademais como premio".
O afectado gañara un primeiro premio da propia Consellería de Educación a proxectos de innovación tecnolóxica e outro primeiro premio de innovación na Formación Profesional. Porén, a consellería, constata a xustiza, "só os valorou como premio e non como proxectos de innovación".
![](https://praza.gal/storage/uploads/roman-a431bc0.jpeg)
O TSXG constata que "o logro dos respectivos premios foi debido ao carácter innovador" da actividade do profesor, polo que esixe valoralos como premios e como actividades innovadoras, como prevía o proceso selectivo
Un xulgado do Contencioso-Administrativo deu a razón en primeira instancia ao afectado, ordenando á Xunta que baremase os dous premios cos dous méritos, e non só con un, pero a Consellería de Educación recorreu. Segundo o Goberno galego, os premios á innovación "non serven para acreditar que estamos ante actividades de innovación ou investigación susceptibles de baremación conforme ás bases" do proceso selectivo.
Porén, o TSXG ratifica a visión do primeiro xulgado e di que "o logro dos respectivos premios foi debido ao carácter innovador da actividade desenvolvida" polo afectado. "E é que é difícil de entender que se conceda un premio de innovación por un traballo de innovación e ao mesmo tempo se negue o carácter innovador da actividade desenvolvida nese traballo", engade o tribunal.
Polo tanto, os méritos discutidos figuran acreditados tanto na vertente de proxectos de innovación como na faceta de premios", sentenza o TSXG, co que confirma que a Xunta debe ter en conta na súa baremación o dobre de méritos, como reclamaba o profesor.