O Goberno galego vén incumprindo tanto na OU-536 como na LU-651 os sucesivos prazos que el mesmo se fixou para recuperar a normalidade
O pasado 26 de febreiro unha ponte da estrada OU-536 que une a cidade de Ourense con Trives afundiu ao seu paso por Xunqueira de Espadanedo mentres a Xunta realizaba nela obras de estabilización dun estribo. Este venres, nunha visita á zona, o delegado provincial do Goberno galego, Manuel Pardo, avanzou que a ponte volverá reabrir en decembro, case 10 meses despois do seu afundimento.
Antes desta nova previsión de apertura o Goberno galego foi dando sucesivos prazos de remate dos traballo: primeiro ía ser en xullo, despois ao longo do verán, máis tarde no último trimestre do ano e agora no mes de decembro.
A Xunta tamén ten pendente de reconstruír outra estrada da súa titularidade afundida, a LU-651 que é a principal vía de comunicación do Courel. Afundida en marzo de 2022, ao colapsar unha mina existente baixo ela, a súa reconstrución levará cando menos catro anos.
O pasado marzo o presidente Rueda defendeu a "celeridade" do seu Goberno con este tipo de obras
Tras o afundimento da estrada a Xunta habilitou un desvío provisional e a daquela conselleira de Infraestruturas, Ethel Vázquez, fixaba en setembro de 2022 a previsión de poder licitar as obras de reconstrución a finais de 2023. Porén, foi aínda o pasado setembro, dous anos e medio despois do afundimento, cando a Xunta vén de aprobar o proxecto de reconstrución da vía. Agora o Goberno galego ten que completar os trámites expropiatorios "para poder licitar posteriormente a execución das obras" cun prazo de execución de 12 meses. Isto é, tendo en conta os trámites pendentes, a obra non poderá estar rematada antes de 2026.
Porén, en marzo deste ano o presidente Rueda defendeu a "celeridade" do seu Goberno con este tipo de actuacións.
Ademais da "reconstrución da LU-651" aínda pendente pouco antes de chegar a Folgoso do Courel desde o sur, desde esa localidade cara ao norte veñen acometéndose nos tres últimos anos outros traballos de ampliación da estrada que están a obrigar a reiterados cortes e desvíos do tráfico que afectan especialmente ao transporte escolar.
