O Goberno galego empeorou a disparidade nos últimos anos nomeando aínda máis homes como conselleiros en varias sociedades que antes si eran paritarias, como o Xacobeo ou Seaga
O pasado luns 3 de maio celebrouse a reunión constitutiva da sociedade de maioría privada creada pola Xunta para captar fondos europeos de recuperación, un acto do que o Goberno galego divulgou imaxes e a composición do seu consello de administración “formado por nove membros”, segundo salientou, todos eles homes.
Tras as críticas chegadas de diversos eidos pola ausencia de mulleres, o xoves o presidente Feijóo asegurou que o presentado tres días antes non será o consello de administración definitivo e pediu agardar a que se coñeza tamén a executiva que dirixa a sociedade para “avaliar se hai mulleres”. Porén, máis alá da situación desa sociedade de maioría privada na que participa a Xunta, a metade das empresas públicas nas que a administración galega ten a participación maioritaria incumpren a Lei de Igualdade no que á paridade dos seus consellos de administración se refire e varias delas, como a que xestiona o Xacobeo ou Seaga, empeoraron a disparidade nos últimos anos.
A Lei de Igualdade estatal aprobada hai 14 anos establece como baremo xeral de paridade unha relación entre homes e mulleres de 60/40 ou 40/60 que é obrigatoria nas empresas públicas estatais e unha recomendación para o resto de administracións e sociedades, ao igual que a Comisión Nacional do Mercado de Valores (CNMV) recomenda cando menos un 30% de mulleres nos consellos de administración. Pero esas cifras incúmprense claramente en 6 das 13 sociedades mercantís públicas autonómicas que a propia Xunta recoñece ter na súa web de transparencia. A cifra de empresas de maioría pública que incumpren a paridade é aínda maior se ademais de ter en conta as vogalías deses consellos de administración que nomea directamente a Xunta se contabilizan tamén as designadas por empresas privadas que participan de xeito minoritario.
No consello de administración da sociedade de xestión do Xacobeo había hai ano e medio catro mulleres e catro homes e agora son dúas mulleres e oito homes
Non todas as empresas públicas da Xunta comunican abertamente nas súas páxinas web a composición no momento actual dos seus consellos de administración, polo que esta análise realízase con ese dato cando é público ou co indicado nos últimos informes de resultados económicos de cada empresa. Similar metodoloxía empregou Praza.gal hai ano e medio, momento desde o que segue agardando por unha valoración da situación por parte da Secretaría Xeral de Igualdade da Xunta.
Especialmente significativo é o caso do consello de administración da Sociedade Anónima de Xestión do Plan Xacobeo. Hai ano e medio ese órgano tiña catro mulleres e catro homes. Neste tempo foi ampliado e hoxe conta cun total de dez postos, dous máis, pero agora as mulleres son dúas e os homes oito.
Similar situación se produce en Seaga, a empresa pública de servizos agrarios, na que hai dous anos o consello estaba composto por tres mulleres e dous homes e pasou a estar formado por oito homes e unha muller. E na Sociedade Pública de Investimentos de Galicia (SPI), onde daquela había dúas mulleres fronte a catro homes e o consello foi ampliado con dous homes máis, ata un total de seis, fronte ás mesmas dúas mulleres.
A situación contraria, pero sen lograr aínda así a paridade, prodúcese en Xesgalicia, unha das dúas sociedades públicas, tamén con participación privada, encargadas de xestionar os investimentos de risco de iniciativas privadas nos que participa a Xunta. No seu consello de administración os homes nomeados pola Xunta son seis fronte a unha soa muller, aos que hai que sumar un conselleiro máis nomeado por un socio privado. Hai ano e medio a disparidade era algo maior xa que a Xunta tiña un conselleiro home máis, ata un total de sete, fronte á mesma única muller. Na outra sociedade de capital risco da Xunta, Sodiga, hai dous homes e dúas mulleres nomeados pola Xunta, pero a paridade acaba desaparecendo ao sumar outros tres homes designados por socios privados.
Tampouco cumpren coa paridade Xestur, a empresa de xestión de solo da Xunta, con dúas mulleres fronte a catro homes, nin Galaria, a empresa pública encargada de xestionar alta tecnoloxía sanitaria. Alí, segundo as súas últimas contas presentadas -a empresa non transparenta directamente os seus órganos de goberno-, os homes son cinco e as mulleres dúas.
Si se cumpriría a paridade segundo os datos facilitados pola propia Xunta, aínda que nalgún caso con algún home máis que a cifra de mulleres, na CRTVG (3 homes e 3 mulleres), Galicia Calidade (4 homes e 3 mulleres), Retegal (4 homes e 3 mulleres) e Xenética Fontao (2 homes e 2 mulleres). Pola súa banda, como xa se indicou para o caso de Sodiga, en Sogama cumpriríase a paridade se se teñen en conta só os vogais nomeados pola Xunta (3 mulleres e 2 homes), pero nesa empresa controlada pola Xunta tamén é socia ao 49% Naturgy e os seus vogais no consello de administración son cinco homes. Algo similar pasa co Parque Tecnolóxico de Galicia, con 3 homes e 2 mulleres entre os membros nomeados pola Xunta pero con máis homes entre os conselleiros nomeados por empresas privadas.
A Xunta tamén participa noutras empresas privadas de xeito minoritario, como en Reganosa, onde as vogalías que designa o Goberno galego son para catro homes e unha muller
Esta é a situación nas empresas propiedade total ou maioritariamente da Xunta, analizando mesmo por separado os vogais nomeados polos posibles socios privados. Pero o Goberno galego participa en moitas outras empresas de capital maioritario privado en cuxos consellos de administración tamén propón vogalías, como é o caso da sociedade agora creada para os fondos europeos. Esas empresas non están identificadas na web de transparencia da Xunta, pero por exemplo nunha das máis importantes, Reganosa, na que é socia do grupo Tojeiro, a Xunta ten no Consello de Administración a cinco homes e unha muller.
