O novo presidente da Xunta, Alfonso Rueda, deu a coñecer este domingo a composición do seu primeiro Goberno, un Executivo de carácter continuista no que apenas se producen cambios. O máis salientable é a incorporación de Diego Calvo (San Sadurniño, 1975) actualmente presidente provincial do PP na Coruña, que pasa a ocupar a Vicepresidencia segunda e a consellería de Presidencia, Xustiza e Deportes, recollendo algunhas das competencias que anteriormente dependían do propio Rueda.
Calvo pasa a ocupar a Vicepresidencia segunda e a consellería de Presidencia, Xustiza e Deportes
No resto de departamentos non hai mudanzas nos nomes, aínda que a Vicepresidencia primeira pasa a ser agora a económica, na que continúa Francisco Conde, responsable da Consellería de Economía, Empresa e Innovación, que se converte no número dous do Executivo
Ademais, as competencias de Turismo pasan a depender da Presidencia da Xunta, "como mostra da prioridade que se lle dá a esta área para esta década Xacobea", destaca o Goberno galego. En cambio, os contidos de Deporte, que anteriormente eran competencia directa do presidente, pasan á Vicepresidencia de Diego Calvo.
No resto de departamentos non hai mudanzas nos nomes, aínda que a Vicepresidencia primeira pasa a ser agora a económica, na que continúa Francisco Conde
Finalmente, prodúcese pequenas modificacións nas denominacións de dous departamentos, coas incorporacións de xuventude e formación profesional aos nomes das súas respectivas consellerías (a Política Social e Xuventude e a Cultura, Educación, Formación Profesional e Universidades).
Mentres non se proceda ao desenvolvemento da estrutura do decreto asinado este domingo polo presidente Alfonso Rueda, os órganos superiores e de dirección existentes manterán a súa estrutura e funcións.
Diego Calvo, de posible rival a número 3
Diego Calvo foi presidente de Novas Xeracións e converteuse en deputado do Parlamento de Galicia en 2003, con só 28 anos. En 2009 foi nomeado delegado da Xunta na Coruña e no 2011 acadou a Presidencia da Deputación da Coruña, cargo que mantivo ata o 2015, cando a institución pasou a mans da esquerda, grazas ao pacto acadado entre PSdeG e BNG. Ademais, foi vicepresidente primeiro do Parlamento en 2016. Actualmente é presidente provincial do PP na Coruña.
Nas semanas anteriores á designación de Alfonso Rueda, Diego Calvo foi o líder territorial máis reticente a entregar o seu apoio ao agora presidente
Nas semanas anteriores á designación de Alfonso Rueda, Diego Calvo foi o líder territorial máis reticente a entregar o seu apoio ao agora presidente e tardou uns días en anunciar o seu beneplácito cando os outros dous baróns (Candia e Baltar) e o propio Feijóo xa se pronunciaran en favor da “unidade” e de que unha mesma persoa asuma de xeito inmediato a dirección no partido e na Xunta. Nese momento, Rueda ofreceulle un posto no seu Goberno: "se queres estar, estarás", díxolle.
