Para aplicar a medida Renfe creará un novo abono vixente entre o 1 de setembro e o 31 de decembro para un mínimo de 16 viaxes
O Goberno de España desvelou este luns, e comezou a concretar no BOE deste martes, como será a aplicación práctica da súa anunciada medida de viaxes recorrentes gratis en trens de proximidade e media distancia, os primeiros existentes en Galicia só na área de Ferrol e os segundos con especial implantación no Eixo Atlántico.
Para gozar da gratuidade as persoas usuarias deberán adquirir, cunha fianza de 20 euros para a media distancia e de 10 euros para as Cercanías, un novo abono específico para o período do 1 de setembro ao 31 de decembro. O importe será devolto ao remate do período tras comprobaren que realizaron un mínimo de 16 viaxes.
A información foi avanzada este luns polo Ministerio de Transportes, mentres que o BOE deste martes establece as liñas marco das medidas de aforro enerxético pero deixa en mans do ministerio a súa regulación concreta. Segundo o ministerio, a aplicación da gratuidade na media distancia permitirá que por exemplo un usuario de bono mensual de tren entre A Coruña e Santiago aforre “700 euros”.
Os novos abonos para gozar da gratuidade poderán obterse a partir do 24 de agosto
Durante o tempo que estea en vigor esta medida, entre o 1 de setembro e o 31 de decembro, Renfe suspenderá a venda do resto de abonos de distinto tipo que viña ofrecendo e só estará dispoñibles para a venda billetes dunha única viaxe ou de ida e volta, coas tarifas habituais. Pola súa banda, os novos abonos para a gratuidade poderán obterse a partir do 24 de agosto.
O ministerio tamén ratifica a rebaixa do 50% xa anunciada para os servizos Avant de alta velocidade en media distancia. En Galicia préstanse na liña Ourense-Santiago-A Coruña, pero tras as reclamacións de partidos políticos e persoas usuarias queda en mans do ministerio que na regulación aínda pendente da medida ese servizo pase a ser tamén gratuíto, como defendeu nunha recente entrevista en La Voz de Galicia a secretaria de Estado de Transportes, a galega Isabel Pardo de Vera.
Transportes ratifica tamén a rebaixa xa anunciada do 50% nos Avant
Nesa liña de aumentar os descontos e gratuidades a respecto das medidas anunciadas inicialmente a comezos de xullo, o Goberno de España tamén vén de incorporar rebaixas do 50% nalgunhas liñas de alta velocidade de media distancia que non eran consideradas Avant, como o treito Ourense-Zamora.
Por último, o ministerio tamén lembra que as liñas de autobús de competencia estatal tamén aplicarán descontos do 50% en abonos de varias viaxes no mesmo período do 1 de setembro ao 31 de decembro.
