A elección de galega Nadia Calviño como presidenta do Banco Europeo de investimentos é "un merecido recoñecemento á mellor ministra de Economía que tivo España”, asegura Besteiro
A elección de galega Nadia Calviño como presidenta do Banco Europeo de investimentos é, sen dúbida, un respaldo á política económica dos socialistas, ademais dun merecido recoñecemento á mellor ministra de Economía que tivo España”. Con estas palabras o candidato socialista á Xunta de Galicia e deputado nacional, José Ramón Gómez Besteiro, felicitaba a vicepresidenta primeira do Goberno de España, tras coñecerse este venres o seu nomeamento como presidenta do Banco Europeo.
Besteiro engadiu que “para o socialismo galego é moito máis: é un orgullo ter a unha de nós presidindo o principal banco público da Unión Europea” e subliñou o prestixio que supón a súa designación porque “a diferenza dos gobernos do PP, desde a chegada de Pedro Sánchez á presidencia, o peso de España en Europa non parou de medrar. E a elección de Nadia é outro bo exemplo da boa xestión económica dos socialistas”.
![](https://praza.gal/storage/uploads/nadiacalvinho-09c4d9a.jpeg)
Besteiro tivo tamén palabras de agradecemento para Nadia Calviño ao recordar que, cando foi nomeado como candidato socialista á Presidencia da Xunta de Galicia e malia á súa apretadada axenda, a nova presidenta do Banco Europeo de Investimentos “fixo o imposible” por estar presente xunto a el e todos os socialistas de Galicia nun acto tan significativo.
Desde o 1 de xaneiro
Os países da Unión Europea (UE) elixiron este venres a actual vicepresidenta e ministra de Asuntos Económicos española para presidir o Banco Europeo de Investimentos (BEI) a partir do 1 de xaneiro de 2024 en substitución do alemán Werner Hoyer.
Calviño impúxose na carreira por presidir o banco público da UE á vicepresidenta da Comisión Europea Margrethe Vestager, que deixou o posto temporalmente para participar neste proceso de selección, ao exministro de Finanzas italiano Daniele Franco; e a dous dos actuais vicepresidentes do BEI, a polaca Teresa Czerwińska e o sueco Thomas Östros.
Creado en 1958 e con sede en Luxemburgo, a misión do BEI é proporcionar préstamos e avais a proxectos de todos os sectores que busquen o desenvolvemento das rexións europeas a modernización ou reconversión de empresas, o desenvolvemento de novas actividades; ou proxectos de interese común para varios Estados e, cada vez máis, no exterior.
Aínda que inicialmente xurdiu para impulsar a cohesión en Europa, nos últimos anos foi gañando competencias: desde mobilizar financiamento a empresas tras a crise de 2008, ata financiar a loita contra o cambio climático, o apoio ao desenvolvemento de vacinas durante a pandemia ou a canalización do apoio a Ucraína pola guerra.