Ángeles Vázquez vaticina que "se verían afectados uns 25.000 empregos" e un volume de facturación "estimado en 3.714 millóns", pero ao tempo admite que "nestes momentos é difícil aínda calcular o alcance concreto que terían os cambios"
Para a conselleira de Medio Ambiente, Ángeles Vázquez, a intención do Goberno de España de limitar a ocupación da costa, de titularidade pública, con concesións privadas, como lle pide a Unión Europea, provocará "caos social e económico en todo o país". Así o salientou o seu propio departamento nun comunicado logo de reunirse en Bruxelas con responsables da Comisión Europea, impulsora da reforma legal en España para acoutar as concesións, aos que transmitiu que "se verían afectados uns 25.000 empregos" e un volume de facturación "estimado en 3.714 millóns". Uns cálculos que lanzou ao tempo que admite que "nestes momentos é difícil aínda calcular o alcance concreto que terían os cambios".
A xira da conselleira Vázquez por Bruxelas para queixarse de supostos agravios a Galicia comezou este luns con encontros nos que pediu poder cazar lobos ou criticou o poder xudicial español por parar cautelarmente parques eólicos mentres analiza o seu impacto. E este mércores reuniuse con "varios membros da Dirección Xeral de Mercado Interior" para criticar que o Goberno de España vaia reformar o regulamento de Costas para restrinxir as concesións, como lle pide precisamente a Comisión Europea.
A reforma legal estatal parte dun procedemento de infracción aberto pola UE contra España por facilitar concesións e prórrogas no litoral sen concursos públicos abertos, o que supón precisamente un ataque ao libre mercado en beneficio de empresas xa establecidas na costa como "por exemplo, empresas papeleiras". Para iso o Estado limitará a duración das concesións e establecerá que só se poidan outorgar con competencia entre posibles solicitantes, como establece a directiva europea de servizos. E precisamente ante a Dirección Xeral de Mercado Interior da UE foi queixarse este martes a conselleira.
A conselleira lamenta que conserveiras, bateas ou outras industrias no litoral teñan que someterse a medidas en defensa do libre mercado como os chiringuitos de praia
Segundo o seu comunicado, criticou que "a intención é aplicar a directiva de servizos tamén ás actividades do complexo mar-industria polo que se equiparará a situación dunha batea ou dunha conserveira coa dun chiringuito de praia". Isto é, a conselleira lamenta que bateas ou conserveiras deban someterse a medidas para garantir o libre mercado como as que se aplican aos chiringuitos, que son outorgados aos mellores ofertantes e por tempos máis limitados.
Segundo salienta a consellería, o novo regulamento "provocará inseguridade xurídica e un caos social e económico en todo o país xa que permitiría a anulación de prórrogas a concesións xa outorgadas, a denegación de novas solicitudes e un réxime en xeral máis restritivo". Porén, a propia consellería admite que "nestes momentos é difícil aínda calcular o alcance concreto que terían os cambios propostos porque o Estado nunca contou cun rexistro oficial das concesións na costa e case nove meses despois de facerse efectivo o traspaso a Galicia das funcións e servizos para a xestión do litoral, aínda non enviou todos os expedientes nin corrixiu as deficiencias detectadas nos que xa se recibiron".
Tamén este martes o portavoz do PPdeG no Parlamento, Alberto Pazos Couñago, anunciou que no próximo pleno o seu grupo defenderá unha proposición non de lei e unha pregunta urxente fronte ao "ataque" de Pedro Sánchez á costa galega. Pazos pediu que "cese neste intento continuado e incomprensible de boicotear o litoral galego".
