Rueda, a conselleira de Política Social, altos cargos dese departamento e ata o conselleiro do Mar acudiron a residencias ou centros de día nun total de 22 concellos

Desde que o pasado 26 de decembro o Diario Oficial de Galicia publicou a convocatoria das eleccións do 18 de febreiro diversos altos cargos da Xunta realizaron xa dentro das súas axendas oficiais públicas cando menos 27 visitas a centros de maiores repartidos por 22 concellos de toda Galicia. Esas visitas non só estiveron protagonizadas por altos cargos directamente vinculados con ese tipo de centros senón que ata o conselleiro do Mar visitou unha residencia en Cervo, a vila da que foi alcalde.

A xeira de visitas iniciouna ao día seguinte da convocatoria electoral o propio presidente da Xunta, Alfonso Rueda, que o 27 de decembro visitou en Nigrán ás persoas maiores usuarias do programa Xuntos polo Nadal. Despois virían visitas a centros de Portas, Mos, Lugo, Ourense, O Carballiño, Viveiro, Ferrol, Boqueixón, Val do Dubra, Gondomar, A Coruña, Teo, Cervo, Moraña, Xinzo de Limia, Bergondo, Sarreaus, Ortigueira ou Láncara. En Castrelo de Miño chegou a haber neste tempo tres visitas distintas e en Santiago e Arteixo dúas. 

Estas visitas foron protagonizadas polo presidente Rueda; a conselleira de Política Social, Fabiola García, en seis ocasións; e altos cargos responsables das áreas de Maiores, Discapacidade e do Consorcio de Servizos de Igualdade e Benestar, así como os delegados da Xunta en Ferrol, Lugo, Ourense e Pontevedra.

Pero entre as visitas a residencias mesmo houbo unha do conselleiro do Mar, Alfonso Villares, o 22 de xaneiro á residencia e centro de día San Ciprián en Cervo, vila da que foi alcalde. Para este martes convocara o mesmo Villares na súa axenda oficial outra visita a unha residencia, desta volta a de DomusVi en Outeiro de Rei, pero foi posteriormente desconvocada.