Comezan as primarias de En Marea como partido para as xerais a dez días da fin do prazo das coalicións

Luís Villares e Pancho Casal, con persoal afectado polo ERE de Bosch en Vigo, este 4 de marzo CC-BY-SA EM

Hemeroteca

O calendario de En Marea como partido fixaba este luns, 4 de marzo, como data de inicio das súas primarias para a elección de candidaturas ás eleccións xerais do 28 de abril e mais para as europeas do 26 de maio. Unha vez pechados os prazos a formación confirmou que no proceso participan nove candidaturas -dúas por provincia para Congreso e Senado e unha novena para a Eurocámara- cuxos integrantes pedirán o voto ata o vindeiro 7 de marzo. Este procedemento iníciase cando restan apenas dez días para pechar eventuais coalicións para o 28-A.

O 15 de marzo remata o prazo para a inscrición de coalicións nas eleccións xerais

A votación organizada polo partido instrumental baséase no sistema Borda, "no que cada persoa inscrita decide o posto das candidatas segundo as súas preferencias". Terano que facer cunhas listas que, segundo foron presentadas, no caso da Coruña están encabezadas para o Congreso pola actual vicevoceira da formación, Ana Seijas, seguida de Pancho Casal, actualmente deputado no Parlamento. 

En Lugo a proposta está liderada por Cristina Pérez Herráez, agora voceira de Lugonovo no Concello lucense, tras quen se sitúa Javier Arca. A proposta de candidatura ourensá ten á súa fronte a Iván Olmos seguido de Iolanda Pérez Docampo e en Pontevedra o primeiro nome é o de Iris Malvido, que encabeza a proposta por diante de Manuel González Moreira. Gran parte das persoas que integran estas porpostas participaron activamente da candidatura de Luís Villares nas eleccións internas de En Marea.

Villares instou os membros de Anova, Podemos e EU a participaren nas primarias de En Marea como partido e dirixentes destas formacións reiteraron o convite a unha coalición

Estas votacións produciranse despois de que o propio Villares instase a membros de Anova, Podemos ou Esquerda Unida a participaren das primarias de En Marea para pechar unha única opción electoral conxunta para o 28-A. Mentres, algúns dirixentes destas formacións, con avanzados contactos para reeditar a coalición de 2015 e 2016 -que concorreu ás xerais coa marca En Marea- seguen apostando por que En Marea, agora como organización partidaria, acceda a coaligarse cos devanditos partidos. 

Neste sentido pronunciábase este mesmo luns o alcalde da Coruña, Xulio Ferreiro, quen non obstante matizaba que, se finalmente non é posible unha única candidatura, a Marea Atlántica se pronunciará sobre a súa preferencia cara á cita coas urnas. Anova, pola súa banda, reiteraba nos últimos días que defende unha "fronte ampla" para esta cita coas urnas. Aínda que semella improbable que esta posibilidade torne en real, de facelo tería como data límite o 15 de marzo para a súa inscrición ante a Xunta Electoral.

Lídia Senra, nunha imaxe de arquivo durante un pleno da Eurocámara en Estrasburgo CC-BY-NC-SA AGEe

Lídia Senra aspira a ser eurodeputada de En Marea

En 2014 Senra foi candidata de Alternativa Galega de Esquerda en Europa dentro da alianza de Anova con EU

A aprobación definitiva das listas das primarias de En Marea confirma tamén que Lídia Senra aspirará a ser eurodeputada de En Marea na vindeira lexislatura comunitaria. A antiga líder do Sindicato Labrego Galego, que en 2014 concorreu como candidata de Alternativa Galega de Esquerda en Europa (AGEE) dentro da alianza de Anova con EU e outras forzas, é a única aspirante a ser cabeza de lista.

Sandra Pesqueira, Xoán Hermida ou Celsa González son outros dos nomes que figuran nunha lista que, con toda probabilidade, se integrará nunha futura candidatura con outras forzas. Na contorna do partido instrumental apostouse nos últimos meses por unha posible integración na coalición encabezada por Compromís, acordo que a formación valenciana tamén vería con bos ollos. 

Despece

  • Aspirantes a liderar En Marea nas xerais reivindican a formación como "100% galega e sen tutelas"

    Brea (esquerda), Seijas, Malvido e Pérez Herraiz, na presentación das candidaturas CC-BY-SA En Marea

    A campaña interna de En Marea para compoñer as candidaturas do partido instrumental ás eleccións xerais xa está en marcha e as persoas que aspiran a liderar a formación ao Congreso combinan as mensaxes internas con outras en clave estritamente electoral, o que convida a pensar que, agás sorpresa maiúscula, a posibilidade de coalición con Anova, Podemos ou EU é cada vez máis remota. 

    A formación que encabeza Luís Villares xuntou en Santiago a tres das candidatas a deputadas no Congreso e un dos aspirantes a senador. A candidata a encabezar a lista coruñesa, Ana Seijas, chama á participación nunhas primarias das que, asegura, vai saír un proxecto político "100% galego, sen tutelas" e "de país". "Non queremos que ninguén decida por nós, queremos decidir dende Galicia e para Galicia".

    A posibilidade dunha coalición de En Marea con Anova, Podemos ou EU semella xa remota 

    Neste sentido, a aspirante a cabeza de lista por Pontevedra, Iris Malvido, asegura ter a esperanza de repetir un escenario electoral como o "actual", con "En Marea como segunda forza política de Galicia", en referencia aos últimos comicios galegos. Esta, coida, é unha situación que cómpre "aproveitar" para "impulsar políticas" dende o país. "É o momento de recuperar a ilusión", agrega Millán Brea, candidato ao Senado por Ourense.

    Nun contexto de ampla incerteza sobre o futuro electoral tanto das candidaturas que concorran baixo as siglas de En Marea como das listas que conformen os partidos ata agora aliados nesta confluencia, a candidata lucense ao Congreso, Cristina Pérez Herráiz, asegura que En Marea quere trasladar tamén o espírito das mareas municipais aos comicios do 28A. E para facelo, subliña a actual voceira municipal de Lugonovo, defende "unha maior interrelación entre o municipalismo e a política de ámbito nacional" galego, porque "o municipalismo non pode existir sen un proxecto nacional", conclúe.

    Este proceso de primarias desenvólvese mentres, nos últimos días, dirixentes municipais como o alcalde da Coruña, Xulio Ferreiro, volvían apelar á construción dunha nova coalición entre a propia En Marea e os partidos para concorrer ao 28-A como unha única opción electoral. Seijas, Malvido, Pérez Herráiz e Brea amosaron disposición á "cooperación", pero desbotan a fórmula da coalición.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza