O titular da Xunta salienta como “inaudito” o “feito histórico que supón reinaugurar a catedral” tras as obras de restauración dos seus principais elementos, que chegan agora ao seu remate
O presidente da Xunta, Alberto Núñez Feijóo, salientou este sábado “o feito histórico que supón reinaugurar a catedral de Santiago 800 anos despois da súa construción”, segundo salienta o propio Goberno galego nun comunicado. “É algo inaudito”, dixo segundo a nota de prensa oficial, durante unha visita ás obras de restauración do templo que chegan agora ao seu remate. Uns traballos nos que salientou a participación da Xunta e outras administracións para asegurar que “todos aqueles que axudaron a que a catedral recobrara o seu esplendor xa forman parte da historia de Galicia”, abundou.
“Todos aqueles que axudaron a que a catedral recobrara o seu esplendor xa forman parte da historia de Galicia”, di Feijóo
O presidente compara así as obras de rehabilitación da catedral que se veñen realizando nos últimos anos coa propia construción e ampliación do templo ao longo de varios séculos, fundamentalmente co impulso orixinal no século XII do arcebispo Diego Xelmírez. Unhas obras de restauracións que agora afrontan a súa recta final coa retirada das estadas do interior “para abrir a Porta Santa e iniciar o Xacobeo 2021 o próximo mes”, traballos que obrigan a pechar temporalmente o templo a partir desta fin de semana “para volver a abrir en todo o seu esplendor”.
Durante os últimos anos, e ao longo de varias fases, a Fundación Catedral, o Cabido, o Concello e a Xunta veñen desenvolvendo actuacións nas diversas fachadas, as cubertas, o Pórtico da Gloria ou o altar maior no que o presidente cualificou como “un éxito de xestión e un éxito técnico”.
