A Consellería de Educación trasladou aos sindicatos unha proposta para rebaixar os cocientes a 20 alumnos por aula nos niveis de Infantil e Primaria, unha proposición que as organizacións ven "insuficiente" e que consideran "inaceptable" porque, entre outras cuestións, non contempla reducións nin en Secundaria nin en Formación Profesional.
Os sindicatos consideran "insuficiente" e "inaceptable" a proposta da Consellería de Educación, que non contempla rebaixa de alumnado en Secundaria nin en FP
A proposta de Educación será abordada na reunión da mesa sectorial que foi convocada para a mañá do vindeiro luns, onde os tres sindicatos con maior representación na educación galega (CIG, CCOO e UGT) xa advertiron de que expresarán o seu rexeitamento ao documento.
Así, a Xunta propón reducir progresivamente o número de alumnado por clase para pasar dos 25 actuais aos 20, así como un incremento retributivo de ata o 15 % para o profesorado no complemento específico por formación permanente e un complemento de 45 euros mensuais para os equipos directivos dos centros.
O calendario para a redución de cocientes esténdese ata o ano 2034 a comezar polo curso 2024/25, cando baixaría o número de alumnos en 4º de infantil a 23. O seguinte exercicio lectivo pasaríase a 20, un proceso que se desenvolvería en todos os cursos dos dous primeiros niveis de educación ata que no 2033/34 todos teñan 20 alumnos por aula.
O calendario para a redución de cocientes esténdese ata o ano 2034 a comezar polo curso 2024/25
Ante esta proposta, os sindicatos mostraron a súa desconformidade polo calendario de implantación e por que só contemple Primaria e Infantil, cando na ESO, no Bacharelato e na FP din padecer un problema de "saturación".
"É un despropósito que se expoña unha redución de ratios a dez anos", advertiu Suso Bermello, secretario xeral da CIG-Ensino, na liña da denuncia de José Fuentes (CCOO), que cualifica o calendario de "tomadura de pelo", ou de Sandra Montero, UGT, que cre que a baixada debe ser "máis inmediata".
Os sindicatos consideran "un despropósito" e "unha tomadura de pelo" a proposta do departamento que dirixe Román Rodríguez
Os sindicatos tamén expresaron o seu malestar por que a proposición de Educación non aborde a demanda de reducir o horario lectivo do profesorado para situalo en 18 horas en Secundaria e 21 en Primaria.
Por tanto, cren que o documento elaborado pola Administración autonómica "pode ser un punto de partida" pero "en ningún caso" pode ser o "de chegada", polo que demandarán o vindeiro luns a Educación que se abra a negociar cos sindicatos, quenes reiteran a súa disposición a iniciar mobilizacións se non existe un acordo.
De feito, as tres organizacións sindicais mostraron a súa desconformidade coas "formas" do departamento que dirixe Román Rodríguez ao remitir un venres unha proposta que será abordada o luns en mesa sectorial, que adoita reunirse os martes.
Ademais, a proposta en materia retributiva da Xunta contempla subidas lineais de 45 euros mensuais para o persoal que exerza funcións directivas en centros de menos de tres unidades, xefaturas de residencias, membros de equipos de orientación ou asesores técnicos.
Tamén frece un incremento mensual do 15 % no complemento específico por formación permanente, medida coa que persegue "incentivar" a "actualización constante de coñecementos e destrezas que repercute nunha mellor atención do alumnado".
Por último, recolle o compromiso de elaborar un plan de simplificación de tarefas burocráticas nos centros ou a posibilidade de que os órganos de coordinación docente poidan celebrar reunións telemáticas se así o acorda o claustro ou o órgano convocante.
