España anuncia a apertura da fronteira con Portugal o 22 de xuño e rectifica ante a sorpresa do Goberno luso pola unilateralidade

Ponte internacional entre Tomiño e Vila Nova de Cerveira © Cámara Municipal de Vila Nova de Cerveira

Dúas horas despois do seu anuncio, Maroto foi desautorizada por Moncloa, que reafirmou que as fronteiras permanecerán pechadas ata o 1 de xullo

A ministra de Industria, Comercio e Turismo, Reyes Maroto, anunciou este xoves a primeira hora que España reabrirá as súas fronteiras con Portugal e Francia o vindeiro 22 de xuño, adiantando este movemento, que en principio ficara adiado ata o 1 de xullo. Segundo as declaracións efectuadas a xornalistas estranxeiros, a apertura de fronteiras coincidiría coa finalización do derradeira estado de alarma e nun momento no que unha parte maioritaria do territorio do Estado español (comezando por Galicia) se atopará xa na Fase 4 do desconfinamento, ou na 'nova normalidade', con normas de prevención máis laxas.

Porén, apenas dúas horas despois Maroto foi desautorizada por Moncloa, que reafirmou que as fronteiras permanecerán pechadas ata o 1 de xullo. Nun comunicado, o Goberno español afirma que "tendo en conta os compromisos anunciados de reapertura do turismo internacional, a mobilidade internacional segura terá lugar a partir do 1 de xullo". E asegura que ao concluír o estado de alarma, o 21 de xuño, a única mobilidade que se abrirá totalmente será a "nacional".

O ministro de Negócios Estrangeiros, Augusto Santos Silva, afirma que o seu Executivo ficou "sorprendido" co anuncio, que “não se inscreve” na "cooperação estreita" existente entre os dous Gobernos para a xestión da fronteira

Con todo, o primeiro anuncio -moi agardado nas localidades da raia- fora xa recibido en Portugal con "sorpresa" e críticas, o que deixaba a súa viabilidade no aire. O ministro de Negócios Estrangeiros do Goberno luso, Augusto Santos Silva, afirmou en declaracións aos medios de comunicación que o Executivo ficou "sorprendido" coa declaracións de Maroto, pois o anuncio “não se inscreve” na "cooperação estreita" existente entre os dous Gobernos para a xestión da fronteira. 

O ministro portugués deu a entender que a decisión española non fora comunicada previamente, polo que o Executivo luso xa solicitou "esclarecimentos" ao Goberno español. "Quem decide sobre a abertura da fronteira portuguesa é naturalmente Portugal e Portugal quer fazê-lo em coordenação estreita com o único Estado com o qual tem uma fronteira terrestre, Espanha”, sinalou Santos Silva.

Alcaldes e alcaldesas da 'raia', na protesta simbólica pola apertura da fronteira, na Ponte da Amizade © Deputación de Pontevedra

 O Goberno español afirmara que permanecería pechada ata o 1 de xullo

Aínda este martes, o ministro portugués de Administración Interna, Eduardo Cabrita, pechou as portas á posibilidade de que a circulación entre os dous países se puidese restablecer antes do 1 de xullo, por manter España aínda medidas de contención da enfermidade e por ser esa a data anunciada por Madrid para a apertura da fronteira.

14 concellos galegos e portugueses, dunha e doutra beira do Miño, levaron a cabo este mércores unha protesta para pedir a apertura de máis pasos fronteirizos

14 concellos galegos e portugueses, dunha e doutra beira do Miño, levaron a cabo este mércores unha protesta para pedir a apertura de máis pasos fronteirizos, sinalando que é “inxusto” que a fronteira que asume o 50% de todos os tránsitos en España e Portugal só teña habilitado un paso en Tui-Valença.

Destacaron que haberá maiores garantías de seguridade sanitaria se a circulación dos vehículos se fai a través de varias pontes en lugar de concentrar o tránsito en Tui-Valença. A directiva do AECT Rio Minho asegura que a solución é unha “simple cuestión de medios” para os estados español e portugués: poñer controis con garda civil e GNR nos pasos máis transitados.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.