O secretario xeral do PSdeG, Valentín González Formoso, reivindicou este domingo a campaña "limpa e construtiva" dos socialistas galegos fronte ao "proceso de embarrar" do PP.
"Imos facer unha campaña como facemos sempre: limpa, construtiva e positiva, moi afastados dese proceso de embarrar a política que ten o PP habitualmente. Estámolo vendo en Santiago e Ferrol", dixo Formoso, en declaracións antes da presentación da candidatura de Bernardo Fernández á alcaldía de Pontedeume.
Ademais, o líder do PSdeG di que o partido afronta esta campaña electoral das municipais "coa maior ilusión e o maior compromiso" cos 313 municipios galegos.
Formoso cre, no entanto, que a cidadanía é "perfectamente consciente" de que as forzas políticas que "son quen de modernizar a sociedade son as forzas que traballan en positivo" e que "se comprometen cos obxectivos de reter o talento e protexer as persoas máis vulnerables".
Tamén insistiu Formoso en que "toda a forza" do PSOE estará posta nas municipais en Galicia, coa presenza de Pedro Sánchez a vindeira semana nun acto en Lugo e de varios ministros para apoiar candidatos locais do PSdeG.