Tres anos e medio despois de aceptar o ofrecemento de ser candidato á presidencia da Xunta por En Marea, o maxistrado en excedencia Luís Villares abandona a política partidaria. A dous días do peche do prazo de rexistro de candidaturas para as eleccións galegas do 5 de abril, un visiblemente emocionado Villares compareceu ante a prensa para anunciar a súa renuncia a participar nas primarias de En Marea e á súa condición de voceiro desta formación.
"Chamáronme e fun sen preguntar máis nada, pero as cúpulas dos partidos impediron que esa alternativa florecese", asegura o ata agora voceiro de En Marea, que retorna ao traballo como xuíz
"Chamáronme e alá fun sen preguntar máis nada", evocou Villares a respecto das semanas de 2016 nas que as formacións políticas que impulsaran En Marea contactaron con el por vías diversas para lanzar a súa candidatura. "Fixéronme -asegurou na súa despedida- o encargo de liderar un proxecto político plural" e accedeu "coa ilusión de construír unha alternativa para que a xente vivise mellor". "Pero as cúpulas deses partidos impediron que esa alternativa florecese plenamente", reprochou.
Do seu punto de vista, o espazo político que concorreu unido baixo as siglas de En Marea en 2016 caeu nunha "desbocada carreira polo de sempre, por un sillón" e neste tempo acabou caendo na "convicción" de que "aquela chamada tiña trampa". "Eses partidos tratáronnos como escusa", láiase, nunha lexislatura na que deu en sentirse como "un intruso". E dado que "como sempre dixen, o meu paso pola política era temporal, non vin perpetuarme en ningún posto". E por iso a retirada.
Villares marcha afirmando non observa "ningunha razón programática para que non poida haber un acordo político" no eido da esquerda galega para as eleccións do 5A
Villares prevé retomar a súa carreira xudicial e di marchar da política partidaria coa esperanza de que se "impoña a sensatez" entre as formacións de esquerda cara á vindeira cita electoral. Malia todo, mantén, segue sen observar "ningunha razón programática para que non poida haber un acordo político" e que "a esquerda deste país non poida concorrer unida". Segue, asegura, sen entender "por que nos temos que enfrontar as mareas co Bloque ou con Podemos. E se me apuran, ata co PSOE; por que non podemos facer unha lista de ideas de progreso?", cuestionou.
Ao cabo, cre, nos últimos días se algo está a ficar claro é que non existe un "combate de ideas" que dificulte os posibles pactos" entre, por exemplo, Anova con Unidas Podemos e as mareas municipais. Máis ben, cre, é un "combate de postos" no que, como no seu paso pola política institucional como partidaria, di verse como un "becho raro".
Tras a marcha de Villares fica sobre a mesa o interrogante de cal será o papel de En Marea no 5A. Nos últimos días, por boca do seu ata agora voceiro, mantivo a súa aposta por explorar acordos para as eleccións. Esta posibilidade dependerá, en boa medida, de que finalmente Anova e as principais mareas municipais cheguen ou non a un pacto con Unidas Podemos. Este acordo, no caso de frutificar como coalición, tería que estar pechado, a máis tardar, en apenas dous días, toda vez que o día 21 finaliza o prazo de inscrición destas fórmulas electorais.
