Milleiros de persoas manifestáronse este xoves nunhas trinta localidades galegas para denunciar a xestión da Xunta durante a vaga de incendios que asola Galicia, en especial a provincia de Ourense. 

Convocadas pola Plataforma por un Monte Galego con Futuro —que agrupa máis de 50 colectivos—, foron moitas as persoas que se achegaron a unhas concentracións nas que se denunciou que "a política forestal do PP por "queimar os nosos montes e as nosas casas" e onde, nalgúns casos, se pediu a dimisión do presidente da Xunta, Alfonso Rueda. 

A ministra Yolanda Díaz cualifica de "barbaridade" que se deixe en mans privadas a extinción do lume

A mobilización na cidade de Ourense foi das máis numerosas, ao igual que noutras cidades como Vigo, onde acudiron o seu alcalde, o socialista Abel Caballero, ademais da vicepresidenta do Goberno de España, a ferrolá Yolanda Díaz, ou o deputado do BNG no Congreso, Néstor Rego. A tamén ministra de Traballo cualificou de "barbaridade" que se deixe en mans privadas a extinción do lume, ademais de denunciar a precariedade do persoal encargado destes labores. 

"Nunca máis lumes forestais" foi algunha das proclamas realizadas nunhas mobilizacións con presenza de representantes do BNG ou do PSdeG, así como líderes sindicais, en numerosas localidades que criticaron a xestión da Xunta na vaga de fogos pero tamén a política forestal levada a cabo polo PP á fronte do Goberno galego nos últimos anos. 

No manifesto lido nas mobilizacións, a plataforma convocante denunciou a "inacción" dos gobernos galegos do PP, a falta de medios en moitas zonas durante os incendios e o Pladiga, que os colectivos que apoiaron as protestas consideran "unha ferramenta inútil" por ser "unha irrelevante actualización dos anteriores". 

Tamén advertiron das condicións de "absoluta precariedade" na que traballa o persoal de prevención e extinción, así como o feito de que "en plena vaga de incendios, o presidente da Xunta, Alfonso Rueda, pedía medios ao Estado español, en tanto tiña 190 prazas sen cubrir". 

A plataforma convocante denuncia a "precariedade" do persoal de extinción e pide un servizo "público, profesional e permanente"

"A loita contra o lume, na súa faceta de extinción, débese facer desde a óptica dun servizo público, profesional e permanente, polo que se fai necesario crear un Servizo Público de Bombeiros e Bombeiras Forestais, coa dimensión necesaria para atender a realidade existente", reclamaron. 

"A verdadeira política de prevención non é como pensa a conselleira do Medio Rural, María José Gómez, e gran parte da sociedade: ter os montes limpos, as pistas arranxadas e os puntos de auga prestos; senón que pasa por ter un medio rural vivo e con actividade económica produtiva, un monte multifuncional e sustentábel coa implicación da veciñanza comuneira e das persoas titulares particulares nesta posta en valor", expresa o manifesto.

Tamén pide "accións inmediatas nas zonas queimadas" para evitar a erosión dos solos, a declaración de zona catastrófica, a creación dun único servizo público de prevención e extinción ou un "pulo decidido a políticas estruturais que preserven a biodiversidade natural, restauren os ecosistemas danados e recuperen os usos tradicionais e multifuncionais dos montes".