- 🟪🟧🟦EN VINTE | Vinte en Carballo con Chicharrón
Evencio Ferrero fixo 70 anos a pasada primavera. El xa situara hai tempo ese limiar como un bo momento para dar a remuda no goberno dun Carballo cuxa historia xa non se entende sen os seus mandatos.
Con acta de concelleiro dende antes da existencia do propio BNG, o alcalde cede o bastón de mando deixando o Bloque coa súa terceira maioría absoluta consecutiva na capital de Bergantiños. E cun recoñecemento extenso á transformación do municipio protagonizada polos equipos de goberno que liderou dende 2003.
Cando accedeu por primeira vez á alcaldía carballesa, Evencio Ferrero levaba máis de dúas décadas como edil. Primeiro representando o Bloque Nacional-Popular Galego (BN-PG) en 1979 e dende a súa fundación, a un BNG que principiou con 2 escanos, que tivo 6 cando gobernou por primeira vez e que nas últimas municipais obtivo 13 dos 21 da corporación, máis do dobre que a segunda forza, o PP.
O histórico Evencio Ferrero marcha tras dúas décadas gobernando unha corporación municipal da que forma parte dende 1979. Daniel Pérez será o vindeiro rexedor dunha vila que virou en emblema da xestión municipal do BNG, cun "Carballo mola" impensable hai uns cantos lustros
O seu papel como activista veciñal e no asociacionismo da vila, o seu traballo de décadas como profesor de matemáticas na comarca e unha conxuntura política que mesmo foi obxecto de estudo universitario confluíron ata virar Carballo nun dos emblemas municipais para o BNG. E tamén mesmo para mudar a percepción en torno a unha vila en cuxo tecido veciñal e social o alcalde estivo sempre plenamente integrado, mesmo por riba de ortodoxias políticas. E o certo é que o "Carballo mola" sería impensable hai uns cantos lustros.
Afirmaba Ferrero este 1 de outubro de 2025, tras rexistrar na Casa do Concello a súa renuncia, que a "transformación" de Carballo é, ao seu xuízo, o seu principal legado e tamén o que quere preservar e seguir impulsando coa súa retirada. Melloras urbanísticas, peonalizacións, coidado do río Anllóns, a explosión de cor nas medianas de edificios a través da arte urbana, o Carballo Interplay ou a vizosa actividade cultural transcenden os límites do propio municipio e mesmo ás veces, admiten, son aínda máis valoradas fóra, como quen aprecia que medran máis os nenos doutras familias que os propios, ilustra.
"Había opción de esgotar o mandato" e mesmo de concorrer en 2027, pero "é bo momento para botarse a un lado", e procurar "o mellor para Carballo", resume sobre unha decisión que, tras transmitila á súa familia, comunicou á portavoz nacional do BNG, Ana Pontón. A Daniel Pérez, ata agora concelleiro de deportes e deputado no Parlamento, corresponderalle coller o bastón de mando e farao "aos mesmos anos que cando eu tomei posesión" por primeira vez, 48. O seu nomeamento concitou a unanimidade dun BNG local á fronte de cuxa candidatura terá o reto de estaren 2027, por primeira vez sen Evencio como cabeza de cartel.
