Montse Prado critica que a Xunta actúe "de comentarista" do que sucede mentres non planifica as necesidades da poboación pola gran circulación do virus da gripe: "Non reforzaron os profesionais nos centros de saúde nin nos PAC"

"Non é aceptábel que se inste á xente a que se autodiagnostique, a que decida cal é a gravidade da súa patoloxía ou a automedicarse", asegurou este xoves a deputada do BNG Montse Prado, diante do que cualificou como "colapso sanitario" en todo o Sergas polo aumento das enfermidades respiratorias. 

Prado criticou a falta de planificación do Goberno galego e advertiu que tantos os centros de atención primaria como os PAC e hospitais, así como as e os profesionais sanitarios están xa "ao límite". "Aínda non chegamos ao pico máis álxido da gripe e a situación é de auténtica saturación e colapso sanitario", censurou a deputada, que solicita a comparecencia "urxente" do presidente da Xunta, Alfonso Rueda, na Deputación Permanente no Parlamento. 

"Aínda non chegamos ao pico máis álxido da gripe e a situación é de auténtica saturación e colapso sanitario"

A nacionalista incidiu en que esta situación de "extrema gravidade" era "previsible", pero que a Xunta afrontouna "dende a improvisación, sen planificar nada, sen adiantarse e sen organizar". "Non fixeron nada para garantir a accesibilidade á atención primaria, non reforzaron os profesionais nos centros de saúde nin nos PAC", evidenciou, para criticar que a consellería actuase "de comentarista" do que pasa e que "de novo, vai por detrás do problema".

"Cando lle din á xente que caldo, mantiña e repouso e que se tomen determinados analxésicos o que lle están dicindo é que os paguen do seu peto"

"Cando lle din á xente que caldo, mantiña e repouso e que se tomen determinados analxésicos o que lle están dicindo é que os paguen do seu peto. A receita do presidente da Xunta de actuar con sentidiño non é de recibo porque os galegos e as galegas teñen dado mostras máis que suficientes de sentidiño e de paciencia diante da desfeita sanitaria froito de 14 anos de goberno do PP", afirmou Montse Prado. 

Para a deputada nacionalista este "colapso" obedece a un problema "estrutural" no sistema sanitario público que precisa dunha atención primaria forte. Prado puxo exemplos concretos como o do concello de Moaña, sen servizo de urxencias dende a pandemia; o de Tomiño, onde hai dous médicos dos oito que deberan atender para os máis de 14.000 habitantes deste concello; ou o de Marín, con demoras de ata 22 días para conseguir cita con algúns dos facultativos do centro de saúde e onde só consulta un pediatra cando tiñan que ser catro.

Isto provoca unha maior demanda das urxencias hospitalarias, que está a provocar esperas de ata cinco horas no Complexo hospitalario da Coruña e unha media de 500 doentes diarios nos servizos de urxencias dos hospitais de Vigo e Santiago, segundo debullou Monste Prado na súa comparecencia deste xoves. 

A situación do Hospital Clínico de Compostela tamén foi criticada polo PSdeG, o secretario xeral dos socialistas en Santiago, Aitor Bouza, asegurou que é "un auténtico caos" e esixe a Rueda "unha
solución inmediata" porque o dereito á asistencia sanitaria "non pode ser renunciable por parte de ninguén".