A "neutralidade" que a Consellería de Educación esixirá nas aulas o vindeiro curso posibilita, a xuízo do conselleiro, Román Rodríguez, "que haxa pluralismo" e que o seu subdirector xeral de Inspección e Avaliación do Sistema Educativo, Enrique Prado Cueva, escriba artigos nos que eloxia a Vox e fala do "nacionalismo fascista excluínte do BNG e o nacionalsocialismo do PSdeG", segundo vén de desvelar CIG-Ensino. En todo caso, o conselleiro pedirá explicacións ao seu subordinado logo de que o sindicato veña de pedir o seu cese polo que cualifica como artigos "ultras".

Román Rodríguez apela a "respectar a quen pensa diferente" pero pedirá explicacións a Enrique Prado, subdirector xeral a quen o sindicato atribúe a orde de "neutralidade" nas aulas e crítico co "nacionalismo fascista do BNG e o nacionalsocialismo do PSdeG"

Tras desvelar a CIG os artigos escritos por Prado, máximo responsable da inspección educativa en Galicia e a quen fan responsable da polémica orde sobre a "neutralidade ideolóxica" nas aulas, o conselleiro foi preguntado pola súa opinión a respecto das opinións de Prado. "Eu creo que a tolerancia e respectar a quen pensa diferente é básico e fundamental, se non respectamos a quen pensa diferente estariamos nunha especie de totalitarismo", comezou o conselleiro a súa defensa do seu subordinado. "Imos avaliar e imos falar con esta persoa pero sempre partindo da base de que todos temos dereito a ter liberdade de pensamento sempre e cando o teu traballo o fagas con total neutralidade que precisamente é algo que sempre demandamos", engadiu.

O conselleiro foi cuestionado polo feito de que pida neutralidade un cargo que evidencia as súas críticas á esquerda, ao que contestou: "e se pensara ao revés?". "Estamos a falar dun cadro técnico, dun subdirector, hai que avaliar, eu falarei con el pero o que non podemos é caer na intolerancia de ou pensas coma min ou es malo, e dá a sensación de que detrás de todo isto está esa visión, unha especie de pensamento único", di Rodríguez. 

"Aquí precisamente a neutralidade o que posibilita é que haxa o pluralismo, e o pluralismo baséase no respecto, do que pensa coma min e do que pensa diferente", concluíu o conselleiro, falando en todo momento de liberdade de pensamento dun particular pero sen valorar que a denuncia da CIG refírese a publicacións do cargo público sobre a súa propia área laboral.

O BNG pide o "cese inmediato" do xefe da inspección "por ir contra os valores democráticos no ensino"

Pola súa banda, desde o BNG pediuse xa o "cese inmediato" do xefe da inspección "por ir contra os valores democráticos no ensino". A portavoz de Educación no Parlamento, Cristina Fernández, considera "intolerable" que "unha persoa con estas responsabilidades actúe en contra dun sistema educativo baseado nos valores democráticos e no pluralismo intentando impoñer a súa ideoloxía ultra nas aulas galegas".