O presidente evita valorar o voto contra o uso do galego en Europa dunha ex-presidenta do Parlamento e dun ex-vicepresidente da Xunta salientando que el si o falará esta semana nun órgano consultivo de pouco peso
O Comité das Rexións é un órgano consultivo da UE con pouco peso na decisións comunitarias en comparación co Consello, a Comisión ou o Parlamento europeos. É o órgano no que está representada directamente a Xunta de Galicia. E é, segundo o presidente Rueda, "un ámbito axeitado" para o uso do galego. Pola contra, falar nos outros órganos comunitarios a lingua propia de Galicia, un dos tres idiomas cooficiais nun dos estados membros da UE, é para o presidente unha cuestión que supera a súa capacidade de valoración política.
A pasada semana dous destacados ex-altos responsables políticos galegos -a ex-presidenta do Parlamento Pilar Rojo e o ex-vicepresidente da Xunta Francisco Conde- votaron no Congreso xunto con Vox para pedir que o galego non sexa oficial na UE, como asegura que está a negociar o Goberno de España. Este luns Rueda foi preguntado por eses votos de Rojo e Conde, se lle parece adecuado o que fixeron dúas persoas con moi altas responsabilidades no pasado de Galicia e como encaixa esa decisión na súa defensa dun novo pacto polo galego.
Rueda aproveitou a súa axenda oficial para evitar responder ás preguntas reiteradas sobre a actuación dos deputados populares. Porque esta semana o presidente participará en Bruxelas nun encontro do Comité das Rexións, e alí avanzou que ten a intención de "intervir en galego". Un feito que non ten nada de extraordinario, xa que o foro de representación rexional da UE permite desde hai anos intervir en linguas rexionais.
Así que este luns Rueda, ante a pregunta sobre a negativa de Rojo e Conde a que o galego sexa oficial na UE, respondeu que el é partidario de falar galego "onde sexa posible e axeitado", e para el "o Comité das Rexións é un lugar axeitado". "Outra cousa son recoñecementos oficiais, temas de estatus, que a min se me escapan", engadiu o líder popular, que adoita opinar de moitas outras cuestións cando é preguntado.
Porén, sobre o galego como idioma oficial na UE o presidente é esquivo. "Eu non quero entrar", di, xa que "recoñecementos oficiais a nivel da UE corresponden a outros esquemas de funcionamento".
