Fracaso. O PSdeG obtivo neste 18F o seu peor resultado histórico nunhas eleccións autonómicas, logo de asinar xa o seu chan en canto a escanos nos pasados comicios. Nunca baixara daqueles 14 e desta vez, quedou en nove. Cinco menos.
O PSdeG nunca baixara dos 14 escanos que obtivo en 2020; desta vez perde cinco e queda unicamente con nove, no seu peor resultado histórico
Un resultado moi duro para o socialismo galego. "Sen paliativos", recoñeceu José Ramón Gómez Besteiro, candidato do PSdeG á presidencia da Xunta. "O noso principal cometido era facer entender a importancia destes comicios para o futuro de Galicia e a necesidade dun cambio; non o conseguimos... Polo de agora, porque a cidadanía galega situounos na oposición", dixo na súa intervención tras confirmarse os resultados do 18F.
Afrontaba o PSdeG estas eleccións sabedor, desde hai semanas, de que partía dunha terceira praza cuxo sabor final dependería de se os seus escanos contribuían ou non ao cambio e se a aposta por Besteiro daba o pulo suficiente para acompañar, cando menos, a suba agardada que todas as enquisas daban ao BNG no ámbito da esquerda para, como mínimo, manter o apoio dos pasados comicios.
"O noso principal cometido era facer entender a importancia destes comicios para o futuro de Galicia e a necesidade dun cambio; non o conseguimos", di Besteiro
Nin unha nin outra. Non hai cambio e as olladas viran cara ao PSdeG, que con repetir os resultados de hai catro anos ou mesmo perdendo só un escano tería propiciado un goberno progresista na Xunta. Pero o Bloque ocupou unha boa parte do espazo socialista, ademais do que apañou no espazo de Podemos e Sumar. E a mudanza non foi posible porque a esquerda, unha vez máis, redistribuíu os seus votos sen rabuñar apenas na outra banda.
Finalmente, os socialistas asinaron o seu peor resultado nunhas eleccións galegas, con unicamente nove escanos. Con case o 100%% escrutado, o PSdeG perde máis de cinco puntos e queda no 14%, lonxe do 19,4% dos anteriores comicios autonómicos. E, malia o aumento da participación, cae tamén en 50.000 votos.
Caeu, especialmente, nas áreas urbanas. O BNG superouno en Vigo, feudo do alcalde socialista Abel Caballero, en 17 puntos e 26.000 votos. Na Coruña, onde goberna a socialista Inés Rey, en case 20 puntos e nuns 24.000 votos. En Santiago, en máis de 25 puntos e nuns 14.000 votos.
Besteiro advirte do seu "compromiso" para "consolidar un proxecto" no PSdeG e que fará ese "traballo" desde "a oposición"
Todo tras unha campaña na que Ferraz entregouse en Galicia, con varias visitas do presidente do Goberno de España, Pedro Sánchez, e de numerosos ministros ou ex-ministros. Xogou decididamente ao cambio o PSOE, que ve agora tamén como, a nivel estatal, o seu outro propósito, o de abrir unha crise no liderado de Feijóo no PP, non se produce polo momento. Non só, xa que afonda na súa crise territorial a nivel autonómico. Desta vez, nas galegas.
Ábrense moitas interrogantes no PSdeG, aínda que Besteiro, na súa declaración ante a prensa, advertiu do seu "compromiso" para "consolidar un proxecto recoñecido entre a cidadanía, que sexa unha verdadeira alternativa, real e segura". "Ese é o traballo que realizarei desde a oposición", dixo, adiantando o aínda deputado no Congreso que quedará no Parlamento galego, na oposición e como líder dos socialistas.
Ademais, Besteiro insistiu na necesidade de "consolidar" un proxecto a medio e longo prazo. "Aos que teñen certa desilusión, que manteñan viva a forza desa ilusión nesta campaña", dixo. "Ningún cambio é fácil nin se consegue da noite á mañá; non lles imos defraudar", insistiu, para engadir que traballará "desde a oposición polo mellor para os galegos". "Hoxe comezamos unha nova etapa na que reafirmamos o compromiso coa maioría social en Galicia", rematou.
