O "proceso de reflexión" anunciado por Ana Pontón hai case dous meses a respecto do seu "papel" no "cambio de ciclo" que a actual dirección do BNG que emprender tras a Asemblea Nacional que a formación celebrará o vindeiro 7 de novembro na Coruña xa ten resultado. Na liña do agardado por boa parte de dirixentes e militantes do Bloque, Pontón optará á reelección, o que implica que no conclave recibirá a encomenda de continuar como portavoz nacional do BNG.
Pontón sinala que a súa "reflexión" respondeu a que cómpre "fuxir dos camiños trillados, aínda que sexa a opción máis cómoda" para chegar a 2024 en condicións de "conseguir a presidencia da Xunta"
A dous días do Consello Nacional que dará o visto e prace á candidatura a proceso asembleario que ela mesma encabezará -e que, previsiblemente, non contará con listaxes á contra-, Pontón compareceu ante a prensa para explicar a súa decisión cunha escenografía acompasada co que, di, será o principal reto da formación soberanista de aquí en diante: "disputar a hexemonía" ao PP para chegar a 2024 en condicións de "conseguir a presidencia da Xunta".
Defende Pontón que esta "reflexión" non se limitou a escenificar a súa continuidade porque "responde á miña forma de ser e de entender a política e a vida", que implica que "nunca hai que dar nada por feito" e cómpre "fuxir dos camiños trillados, aínda que sexa a opción máis cómoda e rutineira". "O reto é tal -agrega- que non era posible deixarme levar pola inercia".
Ao Bloque, advirte, non lle cabe "acomodarse" cando "está en xogo o futuro de Galiza". "Sería un erro maiúsculo" e por iso "seguir como se nada non era unha opción". Agora, tras ese "alto no camiño", sinala que o plenario do 7 de novembro debe deixar claros os "novos retos" da organización nacionalista tras unha década na que "evolucionou dende a resistencia e a reorganización" ata "o despegue, situándonos como segunda forza" nos comicios de 2020.
Afirma a portavoz nacional do Bloque que o seu "diálogo construtivo e frutífero" nas últimas semanas serviu para constatar que existe "un sentimento nacional moi forte" e "o noso traballo consiste en traducilo en apoio político, social e electoral"
Eses retos, enumerou, comezan por "fortalecer a organización e alargar a base social" para que a actual "fortaleza" non teña "pés de barro". A continuación, apunta, o BNG debe propoñerse "avanzar nas municipais", un proceso no que a dirección que saia da Asemblea terá ampla marxe de manobra. Despois, di, cómpre propoñérense "aumentar a nosa representación nas Cortes" e a continuación, ir "moito máis alá de conseguir unha presa de escanos máis" no Parlamento.
A súa reflexión, explicou Pontón, incluíu tamén un "diálogo construtivo e frutífero" con dirixentes e militantes do propio BNG, mais tamén "con persoas que non militan" pero "comparten que o futuro pasa por un BNG máis amplo". Nese proceso, asegura, reafirmou a convicción de que existe "un sentimento nacional moi forte" e "o noso traballo consiste en traducilo en apoio político, social e electoral".
"Eu non son das que queda a medias e vou dar o mellor", concluíu para advertir que, alén da portavocía nacional, "cando unha forza seria ten un reto tan importante", os "retos son colectivos". O reto de chegar á presidencia do Goberno galego, mantén, é o que agora se propón "testar co conxunto da organización" na Asemblea para, acto seguido, "construír esa outra Galiza posible" cara aos comicios de 2024.
