O PP garda silencio e as tres formacións botan en cara que Feijóo apurase a celebración das eleccións
Anunciouno primeiro Galicia en Común este xoves, seguiu o BNG e este venres o propio candidato do PSdeG confirmou que a súa formación tampouco celebrará actos de campaña na Mariña lucense polo brote de coronavirus que alí se está a rexistrar. Praza.gal preguntou ao PP pola súa postura ao respecto sen obter resposta.
Desde Anova, que participa na coalición Galicia en Común, Xosé Manuel Beiras, que tiña previsto participar nun mitin en Viveiro este sábado, puxo o foco na decisión do presidente Feijóo de acelerar a celebración das eleccións e fixalas o 12 de xullo polos “seus intereses oportunistas”. A candidata do BNG, Ana Pontón, pediu á Xunta que aclare “onde está o protocolo para actuar ante un rebrote” como o da Mariña e censurou que o presidente “siga de brazos cruzados, como se nada pasara”.
Pola súa banda, o candidato do PSdeG, Gonzalo Caballero, lembrou que a decisión de celebrar as eleccións o 12 de xullo foi “unilateral de Feijóo” e pediulle información directa sobre a situación na Mariña. Caballero tamén apelou á responsabilidade da cidadanía e asegurou que a súa formación extremará as precaucións en todos os seus actos.