Rajoy xa é "non grato" en Pontevedra por blindar ENCE ata 2073

Vista aérea da factoría de ENCE © encefora.gal

Rajoy xa é "persoa non grata" na que sempre considerou a súa cidade. O persoal do Concello de Pontevedra viuse desbordado nos últimos días polo aluvión de solicitudes para cubrir a sesión ordinaria do seu pleno municipal, que este luns se celebrou, como é habitual, no escenario do Teatro Principal para permitir un maior acceso da cidadanía. Nesta ocasión a expectación multiplicouse porque sobre a mesa estaba a reprobación do presidente do Goberno de España en funcións, finalmente apoiada polo grupo de goberno, do BNG, aínda que cunha cautela por parte do alcalde, Miguel Anxo Fernández Lores: que a declaración non "distraia" do fondo da cuestión: a blindaxe da fábrica de celulosa ENCE para permanecer onde está, na beira da ría, ata 2073.

Porque esa, e non outra, é a orixe da declaración, promovida polos grupos municipais de PSdeG e Marea, apoiada tamén polo Bloque e rexeitada polo PP e Ciudadanos, así como por un grupo de cargos e simpatizantes conservadores que, tanto no interior como no exterior do recinto, portaban pequenos cartaces coa lenda "Rajoy, persona muy grata" ou "Pontevedra es tolerante", ao carón de repretantes do persoal da factoría, que tamén se manifestaban contra o goberno local. Esas protestas subiron de ton cando o voceiro socialista, Agustín Fernández, comezou a defensa da reprobación. Daquela comezáronlle a chover apupos e insultos por parte dos representantes do PP e do persoal de ENCE, ata o punto que o alcalde se viu obrigado a suspender temporalmente a sesión por dúas ocasións. "Non é a primeira vez que este pleno é secuestrado por unha empresa privada", lamentou Lores en referencia a ENCE: "Que quede claro, non van conseguir que calemos", advertiu.

"Rajoy merece sentir vergoña cada vez que veña por aquí"

O rexedor considera que Rajoy "merece" a reprobación pero lamenta que moitos focos mediáticos se pousasen sobre a cidade agora e non hai un mes, cando o Goberno de España en funcións confirmaba o que moitos na cidade temían: que ante unha eventual despedida do poder, os populares deixarían asegurada a permanencia da pasteira na parroquia de Lourizán, en plena ría, durante case seis décadas máis. Por este motivo, di o socialista Fernández, "Rajoy merece sentir vergoña cada vez que veña por aquí e vexa as chemineas" de ENCE. "O fume de ENCE -agregou Luís Rei, de Marea Pontevedra- seguirá castigándonos durante 60 anos" e por iso o líder popular "gañou a pulso o noso repudio", afirma.

O PP, que abandonou o pleno antes da votación, cre que a moción supón "cuspir" sobre Pontevedra

A reprobación foi rexeitada con dureza polo voceiro do PP, Jacobo Moreira, quen censurou que Lores, ao autorizar o debate da reprobación, provocase que o pleno "pierda el tiempo con semejante tontería". Pontevedra, di o edil, sempre foi "ejemplo de concordia, respeto, pluralidad y civismo" e aprobar esta iniciativa é tanto como "escupir sobre la Pontevedra de Valle Inclán y Castelao". Ao apoiar a proposta de PSdeG e Marea, censura, o goberno local "mancha" a cidade a través do que considera unha "maniobra orquestada" por "los señores del PSOE y Podemos en Madrid". Antes da votación, os edís do PP abandonaron a sesión a xeito de protesta. 

"Do que se trata é de que Rajoy condenou a ría 60 anos máis"

Aintervención de Moreira foi retrucada pola edil Carme da Silva (BNG), quen coida que o PP debera sentir "vergoña" de apelar a Castelao ou Bóveda, perseguidos polo franquismo, para xustificar unha industria instalada, precisamente, pola ditadura. "Do que se trata -subliña a edil- é que o señor Rajoy condenou a ría de Pontevedra avalando a decisión do ministerio a 60 anos máis" de ENCE na ría. O propio PP, subliña, está a admitir que esta foi unha "decisión política" que é "un problema" non só para Pontevedra, senón tamén "para toda Galiza", e da que deberían "avergoñarse". 

Manifestación contra a prórroga

A prórroga de ENCE foi autorizada polo Ministerio de Agricultura a finais de xaneiro e rexeitada poucos días despois nas rúas de Pontevedra por milleiros de persoas que censuraban a "herdanza" envelenada do seu "veciño" Rajoy. Con esta decisión, contra a que o goberno local xa litiga, o Goberno do PP eterniza unha factoría plantada na ría en pleno franquismo -comezou a funcionar en 1958 e o ditador inaugurouna oficialmente en 1963- e cuxo traslado chegou a figurar no programa electoral de Alberto Núñez Feijóo en 2009 e 2012.

A xuízo do alcalde, o que pesou finalmente na decisión non foron criterios ambientais, nin sequera o mantemento dos ao redor de 300 postos traballo que xera a fábrica -reivindicados durante o pleno ao berro de "ENCE si, paro non", senón a abundacia de vínculos entre o PP e o consello de administración de ENCE. Nel senta unha exministra, Isabel Tocino, e un exconselleiro, Carlos del Álamo, ambos con responsabilidades de Medio Ambiente con Aznar e Fraga, respectivamente.

Faixa pendurada da fachada do Concello © ENCE Fóra
Simpatizantes do PP, durante o pleno CC-BY-SA Marea Pontevedra

Despece

  • O PP de Pontevedra pediu en 2010 declarar "persoa non grata" a Zapatero

    Non foron poucos os cargos do PP que nos últimos días, tanto en Galicia como en Madrid, reaccionaron irados ante a declaración de Mariano Rajoy como "persoa non grata" en Pontevedra. Así, por exemplo, a ministra de Fomento en funcións, Ana Pastor, considera "sectario" o comportamento do pleno municipal pontevedrés, o vicepresidente da Xunta, Alfonso Rueda, censurou a "utilización política" do consistorio e o vicesecretario de comunicación do PP, Pablo Casado, considerou propio do "comunismo anaftalinado" reprobar a a "la personalidad más destacada en el último siglo en esa ciudad", en referencia a Rajoy. No entanto, noutrora o PP galego en xeral e o pontevedrés en particular apostou por empregar esta declaración simbólica contra o antecesor de Rajoy na presidencia do Goberno de España, o socialista José Luis Rodríguez Zapatero.

    Foi, nomeadamente, en decembro de 2010. Os populares galegos preparaban a carreira electoral das municipais do ano seguinte e, nun escenario de boas perspectivas, o daquela presidente provincial do partido en Pontevedra e titular da Deputación, Rafael Louzán, cargaba con dureza contra Zapatero por non asistir a ningún dos actos do ano Xacobeo. "É indigno dun político" non acudir a estes eventos, considerou Louzán, antes de instar a Xunta a "nomear persoa non grata a Zapatero por non acudir a Compostela nun ano coma este". "Así xa non faría falta que viñese máis", agregou.

    En 2010 o PP apoiou en Fene declarar "persoa non grata" a Zapatero e "vetar" a súa presenza institucional no municipio

    O que no caso de Louzán non chegou a ser máis que unha petición lanzada á prensa, si se concretara nunha votación poucos meses antes no Concello de Fene. Ao remate da presidencia de quenda de España na UE o veto para a construción naval na antiga Astano continuaba vixente, e o BNG local apostou por reprochalo declarando "non grato" a Zapatero no municipio fenés, na altura gobernado polo socialista Iván Puentes.

    Os populares votaron a favor da reprobación de Almunia no pleno de Vigo en agosto de 2013

    A moción debatida reclamaba o levantamento do veto, declaraba "persoa non grata" a Zapatero e estipulaba o "veto á presenza institucional" en Fene do propio presidente socialista, dos seus ministros José Blanco e Miguel Sebastián, ademais da do comisario da Competencia", Joaquín Almunia" e "do deputado pola provincia da Coruña Xabier Carro", do PSOE. Á hora de votar a proposta saíu adiante grazas aos 5 votos do BNG e os 4 do PP.

    Máis recentemente os populares participaron de igual xeito noutra declaración coma esta, de novo co naval como argumento e con Almunia como protagonista. En agosto de 2013, despois de que a Comisión Europea ditaminase que os estaleiros deberían devolver as axudas do tax lease, o alcalde de Vigo, Abel Caballero, promoveu a reprobación do seu compañeiro de partido e, para facelo, contou co apoio da unanimidade da corporación, isto é, do seu propio grupo, do BNG e tamén do PP.

    Caballero, á súa vez, estivo a piques de enfrontarse a unha declaración de "persoa non grata" no Concello de Santiago no mesmo 2013, tal e como amagou con facer o daquela alcalde compostelán polo PP, Ángel Currás. Quen si recibiu efectivamente a reprobación foi en 2015 a daquela conselleira de Sanidade, Rocío Mosquera, "non grata" para os plenos do Concello e da Deputación de Lugo co voto afirmativo dos socialistas e mais do Bloque e o rexeitamento dos populares. 

    José Luis Rodríguez Zapatero © PSOE

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza