O presidente da Xunta salienta que houbo "moitas bandeiras independentistas" no acto deste domingo apoiado por ducias de entidades, incluídos BNG e PSdeG
Un día despois da gran concentración este domingo na praza da Quintana de Santiago para reclamar que a Xunta mude o rumbo da súa política lingüística o presidente da Xunta constatou que o acto para reclamar unha mudanza de políticas estivo politizado. Rueda, preguntado na rolda de prensa posterior ao Consello da Xunta deste luns pola mobilización, amosou o seu "máximo respecto para as persoas que se foron manifestar", pero a continuación engadiu a crítica: "non creo que sexa unha boa cousa a politización".
Acto unitario en defensa do galego na praza da Quintana o 17 de novembro de 2024
-
Besteiro e Pontón danse a man en primeira liña do acto en defensa do galego deste domingo 17 de novembro de 2024 -
Aspecto da praza da Quintana ateigada durante o acto en defensa do galego deste domingo 17 de novembro de 2024 -
Aspecto da praza da Quintana ateigada durante o acto en defensa do galego deste domingo 17 de novembro de 2024 -
Aspecto da praza da Quintana ateigada durante o acto en defensa do galego deste domingo 17 de novembro de 2024
Segundo o presidente da Xunta este domingo houbo unha "apropiación" da defensa da lingua. Na Quintana, di, había "moitas bandeiras independentistas e logotipos dunha opción política", sen indicar cal, nun acto que contou co apoio de BNG e PSdeG así como de ducias de entidades de todo tipo.
Sobre as conversas políticas que está a manter o conselleiro de Cultura e Lingua para acadar un novo pacto político e social pola lingua o presidente advertiu que "non se pode formular un pacto no que para acadar un consenso haxa que aceptar si ou si o que nos formulan os partidos da oposición". "A nosa liña vermella sempre foi a liberdade de utilización de linguas e o fomento do galego", concluíu Rueda.
