O presidente di que a negativa do actual PPdeG a recibir as competencias de Tráfico é "o conveniente" para Galicia, evita explicar por que
Hai uns días o PPdeG votou en contra dunha iniciativa do BNG para pedir ao Estado as competencias de Tráfico malia que hai 20 anos o daquela presidente da Xunta, Manuel Fraga, defendía que fosen asumidas por unha policía galega "integral". Este luns o actual presidente, Alfonso Rueda, asegurou que o cambio de postura do seu partido é porque a súa negativa actual é "o conveniente" agora para Galicia, pero non explicou por que.
A Rueda preguntáronlle tanto polo cambio de postura a respecto do que defendía Fraga como pola defensa do PP noutras comunidades como Catalunya, Euskadi ou Canarias dunha policía propia. "A Xunta defende o que cre que é conveniente para Galicia en cada momento", respondeu o presidente.
Rueda, que foi director xeral de Administración Local con Xesús Palmou como conselleiro de Interior de Fraga, mesmo se amosou sorprendido pola lembranza ao que defendía o ex-presidente. "Remóntase vostede á época de Manuel Fraga, nin máis nin menos, e as circunstancias poden mudar en todo ese tempo", dixo, para remitirse "ás circunstancias actuais e con independencia do que pensen compañeiros de partido noutras comunidades". Porén, non explicou cales son esas "circunstancias actuais".
O presidente limitouse a reiterar que "o que necesita Galicia agora mesmo é completar a súa unidade de policía adscrita".
