O novo ministro de Facenda será Arcadi España, ata agora secretario de Estado de Política Territorial
A convocatoria de eleccións en Andalucía o vindeiro 17 de maio e a decisión de que a candidata do PSOE sexa a ata agora vicepresidenta primeira e ministra de Facenda, María Jesús Montero, levou este xoves ao presidente Pedro Sánchez a anunciar unha crise de Goberno. Montero deixa o executivo e como ministro de Facenda é nomeado o ata agora secretario de Estado de Política Territorial, Arcadi España. Á súa vez a vicepresidencia primeira pasa a ser ocupada por quen seguirá sendo ministro de Economía, Carlos Cuerpo.
Os cambios foron comunicados por Sánchez na tarde deste xoves nunha declaración institucional en directo tras avanzarllos ao Rei. Na súa intervención o presidente considerou a Montero "a mellor política que coñecín", "piar fundamental neste goberno" e "papel esencial no noso éxito económico".
Sánchez di que Montero é "a mellor política que coñecín" e xogou un "papel esencial no noso éxito económico"
María Jesús Montero era ministra de Facenda desde o primeiro goberno de Sánchez, en 2018 e foi ascendida a vicepresidenta primeira en decembro de 2023, cando a que o era ata daquela, Nadia Calviño, deixou o Goberno para marchar ao Banco Europeo de Investimentos (BEI). Montero é tamén vicesecretaria xeral do PSOE desde xullo de 2022.
Carlos Cuerpo era desde decembro de 2023 e seguirá sendo ministro de Economía, Comercio e Empresa, ao que agora sumará a vicepresidencia primeira do Goberno. A vicepresidenta segunda seguirá sendo a ministra de Traballo, Yolanda Díaz.
Pola súa banda Arcadi España era secretario de Estado de Política Territorial desde decembro de 2023 tras ser conselleiro na Generalitat Valenciana.
