Sánchez defende a amnistía para manter o "muro" fronte ás "forzas reaccionarias"

Pedro Sánchez intervén no pleno da sesión de investidura © Congreso dos Deputados

Hemeroteca

Ante as previsibles e duras críticas polos pactos con forzas independentistas e a proposta de lei de amnistía, Pedro Sánchez advertiu este mércores no Congreso da "axenda reaccionaria" que supón a alteranativa ao goberno que encetará desde mañá unha nova lexislatura, a que conformarían PP e Vox. 

"O único muro eficaz contra as políticas da ultradereita en comunidades e concellos foi o goberno de coalición progresista en España", resumiu Sánchez, que centrou boa parte do seu discurso na primeira das sesións da súa investidura no Congreso en alertar da "involución" que suporía un executivo da dereita e a ultradereita e en reivindicar os "logros incuestionables" do seu executivo. Tamén en enumerar e debullar un amplo catálogo de medidas para reforzar o estado de benestar, a transición ecolóxica na loita contra o cambio climático, as melloras nas condicións laborais ou a igualdade. 

Feijóo segue a intervención de Pedro Sánchez no Congreso © Congreso

Sánchez defende como un dos motivos da amnistía o de "consolidar os avances logrados e seguir avanzando pola senda da convivencia e o progreso" 

Así, Sánchez advertiu que unha dos motivos da aprobación da amnistía aos "encausados polo procés" é tamén o de "consolidar os avances logrados e seguir avanzando pola senda da convivencia e o progreso" e evitar así a "onda reaccionaria" que suporía un goberno das dereitas. 

O candidato a repetir na presidencia do Goberno central dixo que se concederá esa amnistía "en nome de España, do interese xeral e da concordia". "As circunstancias son as que son e toca facer da necesidade virtude", insistiu Sánchez, que amosou o seu "respecto enorme" a quen está e se manifesta pacificamente en contra da lei. "O problema do PP con Vox non é a amnistía, é que non aceptan o resultado electoral", insistiu para alertar dos "poderes económicos" que apoian as dereitas que "o de verdade non queren é seguir mellorando as condicións laborais dos traballadores", a suba das pensións ou as melloras na sanidade. 

"O problema do PP con Vox non é a amnistía, é que non aceptan o resultado electoral", di Sánchez 

"A receita do PP conduciu ao desastre en Catalunya. Apostamos polo diálogo, polo entendemento e polo perdón", dixo Sánchez, que confía en que a lei de amnistía poida axudar en "superar a fractura que se abriu" e que tamén cre, —igual de forma "inxenua", aclarou— que pode "persuadir a aqueles cataláns ou persoas doutros territorios independentistas que España é un bo país para eles". 

"A amnistía é perfectamente legal, acorde coa Constitución", engadiu o líder do PSOE, que pediu ao PP "un  mínimo de responsabilidade", ademais de "cordura e coherencia" para non seguir a "deriva trumpista", tras lembrar os máis de mil de indultos concedidos por gobernos do PP "nun dó día". "Non será un ataque á Constitución, senón unha mostra da súa fortaleza", repetiu. 

Ademais, insistiu en que as "receitas" dos populares provocaron a "maior crise institucional, territorial e constitucional" da democracia e reivindicou a mellor situación política, social e de convivencia en Catalunya desde que goberna a coalición progresista. 

Pedro Sánchez diríxese ao Congreso no pleno de investidura © Congreso

Sánchez instou a elixir entre "unha España que avanza ou a que retrocede" e aclara que a elección "transcende os eixes dereita e esquerda"

Sánchez tirou en boa parte do seu discurso da disxuntiva que supón elixir entre "unha España que avanza ou a que retrocede" e, en clara alusión tamén aos múltiples e variados pactos do PSOE, dividiu as opcións "máis aló da clásica distancia dereita e esquerda" para advertir de que en xogo está a "opción reaccionaria" ou a "progresista", a daqueles que, malia as diferenzas, optan por "avanzar". 

No lado das "dereitas retrógradas" situou aqueles que negan o cambio climático, desprenden clasismo, "impoñen un único modo de ser e sentirse españois", os que atacan o feminista ou rexeitan os cambios. No outro, as "forzas progresistas dispostas a seguir avanzando e non dar un paso atrás". 

"Tócanos elixir camiño", dixo Sánchez, ou "abrindo a porta" ás forzas reaccionarias ou o freándoa "en seco" erguendo "un muro de tolerancia, convivencia e democracia". Foi cando volveu a advertir de que a a elección "transcende os eixes de dereita e esquerda" para situar a elección entre "PP e Vox, que queren claramente retroceder" e os que queren "avanzar". "De formas distintas e con diferenzas importantes, pero avanzar", insistiu. 

Así, Sánchez repasou un lote de medidas de "recorte de dereitos e liberdades" por parte dos gobernos locais e autonómicos das "forzas reaccionarias" e criticou con dureza ao PP e a Feijóo por ter "bendicido e acompañado" a ultradereita, ademais de "branqueala e lexitimala". "Adentrouse no camiño da perdición", dixo, en referencia aos pactos da "ignominia" que supuxeron unha "axenda reaccionaria" en tantos territorios. 

Pedro Sánchez, tras o seu discurso no debate de investidura © Congreso

Ademais, e en clara referencia ás críticas pola "desigualdade" entre cidadáns que suporía a amnistía, Sánchez asegurou que "defender a igualdade" é, entre outras cousas, subir o salario mínimo, gañar dereitos para os traballadores, reverter recortes en dependencia, eliminar copagos farmacéuticos, que haxa un millón de estudantes con bolsa, reducir a fenda salarial, apostar por máis renovables e a descarbonización ou "os 14 millóns de traballadores que recuperaron dereitos coa reforma laboral". "A única igualdade que periga é a das mulleres polos acordos entre PP e Vox", asegurou. 

Por outra banda, Pedro Sánchez tamén despregou un gran catálogo de medidas para os vindeiros catro anos, como a redución da xornada laboral ás 37,5 horas, o impulso dun pacto de Estado de dereitos LGTBI, a gratuidade do transporte público para menores e parados ou a extensión da redución do IVE aos alimentos ata o próximo mes de xuño. 

Despece

  • Sánchez anuncia transporte gratuíto, redución da xornada laboral ou máis bolsas de estudo

    Pedro Sánchez, durante a súa intervención no debate de investidura © Congreso dos Deputados

    Pedro Sánchez presentou durante o seu discurso un paquete de medidas sociais e pactos de Estado de cara á nova lexislatura. 

    A primeira delas foi anunciar a intención de levar a cabo o recoñecemento do Estado de Palestina, como xa recollía o pacto que asinaron con Sumar para formar a coalición. Ademais, Pedro Sánchez prometeu continuar aumentando o salario mínimo interprofesional cada ano para que se sitúe no 60% do salario medio. 

    Ademais, aprobará un novo Estatuto do Traballador e pretende que o goberno de coalición reduza a xornada laboral ás 37,5 semanais, unha das medidas estrela do partido de Yolanda Díaz. O anuncio máis inminente, como anuncia Leo González en infoLibre, é a gratuidade do transporte público para todos os menores, novos e persoas paradas a partir do próximo 1 de xaneiro. 

    Sánchez anunciou un novo Estatuto do Traballador, a redución da xornada laboral ou transporte público gratuíto para menores e parados

    No que ten que ver coa vivenda, o actual presidente en funcións prometeu aumentar o bono de alugueiro que actualmente concede unha axuda de 250 euros mensuais. Tamén propón a concesión de avais públicos do 20% da hipoteca para a compra dunha vivenda así como unha axuda á reforma dos fogares. 

    No ámbito da igualdade, Sánchez comprometeuse a aprobar unha lei que garanta a representación paritaria para romper os teitos de cristal e ampliar os permisos de maternidade e paternidade a 20 semanas. Tamén a universalización da educación infantil de 0 a 3 anos e o recoñecemento ás familias monoparentais con dous fillos o nivel protección das familias numerosas. 

    Sánchez criticou as políticas de recortes en dereitos en materia igualitaria de PP e Vox e asegurou que o seu Executivo destinará 10 euros en materia de violencia de xénero por cada euro que os gobernos autonómicos de dereitas retiren. En materia de educación tamén están previstos o incremento das axudas ao comedor e o incremento da dotación de bolsas. Segundo o anuncio do líder do PSOE, os estudantes universitarios enfrontaranse a unhas taxas máis reducidas e incrementarase o financiamento dos centros de investigación.

    Usuarias do transporte interurbano en Galicia CC-BY-SA Xunta

    "Os ricos van pagar máis que o resto", advertiu Sánchez sobre a política fiscal

    O bono cultural aprobado na pasada tamén se ampliará e os creadores verán aumentadas as axudas a través da aprobación dunha Lei de Dereitos Culturais. O informe dos abusos da Igrexa presentado polo Defensor del Pueblo, dixo Sánchez, servirá de marco de actuación para lexislar sobre a protección ao menor. Para iso, propón eliminar a prescrición da responsabilidade civil dos condenados por abuso, crear un fondo estatal para axudar as vítimas e instar a Igrexa a que recoñeza eses abusos. 

    A dignidade das persoas maiores, anunciou Sánchez, será unha das bandeiras do futuro goberno e por iso anunciou a revalorización das pensións con respecto ao IPC , así como aumentar as axudas á dependencia e proporcionar a todos os que o soliciten unha atención domiciliaria. "Os ricos van pagar máis que o resto", é o anuncio que remarcou Sánchez en materia fiscal. 

    O Imposto de Sociedades será mínimo do 15% e prevese aumentar a progresividade do IRPF. A rebaixa do IVE que foi prorrogada o pasado verán estenderase até xuño do próximo ano. Aumentar as marxes de renda do Ingreso Mínimo Vital é outra das propostas que acompaña as medias de garantía do Estado de Benestar. Sánchez tamén propuxo abordar a saúde mental mediante un novo Pacto de Estado que garanta que a sanidade pública dispoña de psicólogos e psiquiatras para todos os que o necesiten. 

    O sistema público de saúde tamén incorporará tratamentos oftalmolóxicos e bucodentais. Na nova lexislatura pretende entrar en vigor un novo modelo de atención presencial á cidadanía, con horarios flexibles e sen cita previa obrigatoria á vez que se fixará por lei un máximo de 30 días para a recepción de prestacións, como as axudas á dependencia. O Partido Socialista quere loitar contra o cambio climático a través do fomento das renovables e o restablecemento da Comisión Nacional da Enerxía que foi discontinuada polo Goberno de Rajoy en 2013.

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza