Sumar arrinca, por fin, en Galicia. A deputada da formación pola provincia de Pontevedra no Congreso, Verónica Martínez, rexistrou este mércores Movemento Sumar Galicia como partido político no Ministerio do Interior no que, segundo a formación, supón o nacemento oficial dunha "organización galega autónoma" que estará "federada" coa plataforma que a nivel estatal lidera Yolanda Díaz.
Movemento Sumar Galicia rexistrouse este mércores como partido político no Ministerio do Interior e defínese como "organización galega autónoma" federada con Sumar
Segundo explica Sumar Galicia, a formación, coa ollada posta nas vindeiras eleccións autonómicas, pretende "descadrar o taboleiro e ser o imprescindible detonante do cambio político en Galicia" a partir dunha forza "centrada nas políticas públicas útiles". Nuns comicios que define como "xanela de oportunidade histórica".
O partido anuncia, ademais, que dará a coñecer nos vindeiros días unha unha comisión promotora formada por "galegos e galegas de procedencias diversas, pero co obxectivo común de contribuír de maneira decisiva a gañarmos a próxima década como país".
Sumar Galicia cifra en máis de 3.500 os galegos e galegas inscritas en Sumar a nivel estatal
Actualmente, segundo Sumar Galicia, son máis de 3.500 as persoas galega inscritas no movemento a nivel estatal e a todas elas foilles enviada unha carta este mércores asinada por quen exercerá como portavoz da promotora, Paulo Carlos López, antigo dirixente e un dos fundadores de Compromiso por Galicia, é profesor no Departamento de Ciencia Política e Socioloxía da USC, doutor en Ciencia Política pola Universidade de Valéncia e doutor en Comunicación pola USC.
Na carta, López di comprometerse a “seguir tecendo a esperanza e a ilusión que xa está a transformar, con políticas públicas útiles, a nosa realidade cotiá”. Ademais, desde a promotora, cuxa composición se coñecerá nos próximos días, apelan “á unidade de todas as persoas e organizacións que compoñen este espazo político”. “Nunca renunciamos e nunca renunciaremos á unidade”, asegurou o portavoz nacional.
"Iniciamos un camiño que require de toda a enerxía, mobilización e organización para estaren en condicións de ser alternativa de goberno ao PP"
Sumar Galicia asegura que o rexistro do partido supón o primeiro "paso fundamental" para concorrer ás vindeiras eleccións autonómicas, que a formación ve como unha "xanela de oportunidade histórica" para o país. "Iniciamos un camiño que require de toda a enerxía, mobilización e organización para estaren en condicións de ser alternativa de goberno ao PP", din.
"Sumar Galicia nace para gobernar este país e queremos contar con todos os galegos e galegas coa única vontade de que a esperanza se abra paso en Galicia cun cambio de goberno”, engadiu Paulo Carlos López, portavoz dun partido que reivindica o acordo asinado entre Sumar e PSOE a nivel estatal e que a investidura do novo goberno en España "permitirá dar cumprimento".
"Un acordo programático que permitirá seguir mellorando as condicións materiais de vida das persoas grazas a unha ambiciosa axenda social e territorial. Grazas a ese acordo, centos de miles de galegos e galegas traballarán menos e cobrarán máis. A redución da xornada laboral, o aumento so SMI e a reforma do despedimento serán só o comezo dunha transformación que tamén pasa por un claro compromiso de avance no autogoberno galego", explica Sumar Galicia.
Ademais, a formación advirte da súa "vontade de sumar forzas con outros actores" e "ofrecer ás galegas e galegos outro horizonte: un horizonte de seguridade que garanta vidas dignas, tranquilas, con tempo e felices".
