Día Nacional 2026

A axenda do presidente volveu incluír un único punto, asistir á Ofrenda ao Apóstolo na Catedral compostelá, onde o rei estivo representado polo presidente do Parlamento, coa alcaldesa da cidade como anfitrioa da comitiva. Dous conselleiros asistiron á Misa de Rosalía, acto relixioso con vertente civil e innegable raizame galeguista, pero allea á institucionalidade do Día Nacional que procuraran noutrora dirixentes como Camilo Nogueira, histórico nacionalista homenaxeado coa Alba de Compostela do consistorio compostelán

O secretario xeral do PSdeG, José Ramón Gómez Besteiro, pronunciou desde o Centro Galicia de Bos Aires unha mensaxe conectada co acto tradicional do PSdeG en Rianxo, vila natal de Castelao, na que uniu as dúas beiras do Atlántico e situou a Galicia exterior no centro do presente e do futuro do país.

Pontón destacou que a súa forza política é consciente de que ten “unha gran responsabilidade” porque “somos a esperanza deste país, a esperanza que se escribe desde a dignidade, desde os dereitos, desde confiar nas nosas propias forzas”. E por iso, defendeu, “imos a por todas, cun BNG imparable"

O Día Nacional, outra volta coa Xunta optando por un baixísimo perfil, celébrase no marco da fin do período sen novas competencias máis longo da historia da autonomía. A Comisión Mixta de Transferencias Xunta-Estado estivo 13 anos sen reunirse por non ter nada que tratar. En 2025 deu o visto e prace ao traspaso da xestión do litoral e en breve abordará o dos permisos de traballo. O ferrocarril de proximidade, a Policía, o tráfico ou o salvamento marítimo destacan entre as competencias que nos últimos anos Xunta e PP se negan a pedir e asumir malia teren cobertura no Estatuto

O 25 de xullo de 1981 foi o primeiro co Estatuto de Autonomía en vigor, cando xa apenas ecoaba o fustrado intento preautonómico de artellar unha celebración cívica, institucional e política en torno ao Día Nacional. Daquela Xunta que o tentou ficou o soporte institucional que aínda hoxe fai que o 25 de xullo sexa, oficialmente, Día Nacional de Galicia, denominación obviada polo actual Goberno nun clima de atonía institucional sobre a data que este 2026 mesmo levou á 'reciclaxe' da campaña oficial sobre a celebración.