A Coruña e Vigo superaron os niveis máximos de contaminación no aire os catro últimos días

Atasco CC-BY-SA Torange

Hemeroteca

A situación anticiclónica que a Península Ibérica viviu na última semana, unida á chegada de masas de po sahariano a Galicia, fixo que se incrementase notablemente a contaminación do aire nas nosas cidades. Dende o pasado xoves tanto Vigo como A Coruña sitúanse por riba dos límites legais de partículas PM10 (50 microgramos por metro cúbico). Tamén Pontevedra, Santiago e Ferrol superaron dous días ese límite a pasada semana e Lugo e Ourense estiveron igualmente moi cerca de acadalo.

Ecoloxistas en Acción reclama que todas as cidades afectadas poñan en marcha medidas para reducir inmediatamente a contaminación

A situación non é exclusiva de Galicia e nunha nota de prensa Ecologistas en Acción vén de advertir que os niveis de contaminación atmosférica se dispararon en todas as cidades do Estado, moi especialmente en Santa Cruz de Tenerife, Las Palmas de Gran Canaria, Avilés e Santander, superando mesmo os 100 microgramos por metro cúbico. E tamén en Sevilla, Valencia, Córdoba, Getafe, Granada ou Puertollano, que acumulan xa unha semana consecutiva por riba dos límites legais. 

Cómpre salientar que os días nos que os niveis de contaminación atmosférica están motivados en parte por fenómenos naturais (como este, pola chegada de aire do Sahara) non computan para os límites establecidos pola Unión Europea, que indica que estes niveis non se deben superar máis de 35 días ao ano.

Á vista de que a situación anticiclónica se vai manter durante os vindeiros días, a entidade ecoloxista reclama que todas as cidades afectadas poñan en marcha medidas para reducir inmediatamente a contaminación. Pide que se establezan restricións ao tráfico motorizado, como xa se fixo en Asturias e Valladolid, e tamén que as autoridades advirtan ás persoas máis sensibles á contaminación atmosférica (infancia, persoas maiores, embarazadas e persoas con problemas respiratorios ou cardiovasculares) de que se protexan. Ecologistas en Acción tamén insta ás grandes cidades a que aproben plans de acción contra a contaminación para previr estas situacións e estar preparados en casos de novos episodios deste tipo.

A situación anticiclónica continuará toda a semana e este martes seguirá a chegar a Galicia po procedente do Sahara

En Galicia o venres foi o peor día, cunha media de 71 microgramos por metro cúbico de partículas PM10 en Vigo, 64 na Coruña e Santiago de Compostela e 59 en Pontevedra. Ademais do tráfico motorizado, a queima de restos agrícolas e forestais está a incrementar estes días a contaminación do aire. Este luns, de novo os niveis están a acadar nas cidades galegas valores elevados, próximos ao máximo legal. Meteogalicia advirte de que este martes contiuará "a intrusión de masas de po sahariano en Galicia, polo que se poderán ver incrementados os niveis de partículas no aire ambiente ao longo do día".

Despece

  • Alumnado da Coruña e Ferrol convoca folga estudantil contra o cambio climático o 15 de marzo

    O alumnado do CEIP Antonio Palacios do Porriño concentrouse o pasado venres © @miriamleiros

    Un grupo de estudantes da Coruña e Ferrol veñen de convocar unha folga nas aulas contra o cambio climático para o vindeiro venres 15 de marzo, coincidindo coa convocatoria internacional do movemento Fridays For Future.

    Na convocatoria chaman "a ocupar as prazas da cidade, enchelas de charlas, obradoiros, debates e actividades relacionadas co cambio climático". E ás 13 horas, convocan senllan concentracións na Praza de María Pita e na Praza de Armas, fronte aos concellos da Coruña e Ferrol.

    A convocatoria únese ao movemento internacional Fridays For Future

    "Estamos vendo como o noso planeta se encamiña ao desastre polas malas accións e a indiferenza dos nosos gobernos. A xeración dos nosos pais está deixando que o cambio climático, a contaminación dos solos e augas, a extinción de miles de especies ou a destrución dos ecosistemas se converta nunha situación irreversible. O noso futuro está hipotecado para que algúns sigan aumentando as súas fortunas. Os nosos bosques arden e os nosos polos se desxean para pagar os luxos duns poucos", denuncian.

    Fridays for Future Coruña pide que toda aquela escola, instituto ou facultade que queira participa na folga, ao igual que alumnado, profesorado e entidades que queiran organizar actividades se poña en contacto para coordinar as actuacións. O 1 de marzo convoca unha asemblea aberta ás 18 horas no Centro Universitario de Riazor.

    "É a maior crise á que nos podemos enfrentar e necesitamos tratala como tal. Con equidade e sen perder nin un minuto máis. Os gobernos ignoráronnos. Decidiron non actuar. Pero quedaron sen escusas e nos sen tempo. Chegou o momento de cambialo todo", conclúen.

  • Marcos Pérez Pena

    Marcos Pérez Pena

    Marcos Pérez Pena (Montevideo, 1980). Tras ter traballado en Vieiros.com e outros medios, en 2012 formou parte do equipo que puxo en marcha Praza. Doutor en Xornalismo pola USC, analizou na súa investigación o papel da prensa en Galicia durante a Transición.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza