A incidencia da COVID acelera o seu descenso en Galicia mentres comeza a vacinación do grupo de idade máis numeroso

Indicacións para a realización de test da COVID en Carballo e mapa de incidencia acumulada a 14 días con datos do 6 de xuño de 2021 CC-BY-NC-SA Foto: Concello de Carballo | Montaxe: Praza Pública

Hemeroteca

O Servizo Galego de Saúde notificou este luns, 7 de xuño, 54 casos novos da COVID-19, os rexistrados entre as seis da tarde do sábado e a mesma hora do domingo. Para atopar unha cifra máis baixa nun período de vinte e catro horas coma este hai que remontarse ao 6 de agosto de 2020, cando foran 44. Daquela, non obstante, a capacidade diagnóstica do Sergas era moi inferior á actual: boa mostra disto é que, nun contexto sen usos masivos doutro tipo de test como os de antíxeno, en Galicia procesábanse daquela unhas 1.500 PCR ao día e agora, na última semana completa foron de media máis de 4.000 por xornada.

Os 54 casos novos notificados polo Sergas este luns son a cifra máis baixa en 24 horas dende o 6 de agosto de 2020, cando a capacidade diagnóstica era moi inferior á actual

As cifras de novos casos detectados van á baixa e esa melloría reflíctese nuns indicadores de incidencia acumulada que aceleran a súa baixada xusto cando o Sergas comeza a vacinación da poboación de entre 40 e 49 anos, o grupo de poboación máis numeroso (composto por case 443.000 persoas, con datos do IGE a 1 de xaneiro de 2021). A máis inmediata (e á que o Sergas concede cada vez máis importancia) reflicte que nos últimos sete días Galicia rexistra uns 24 casos novos por cada cen mil habitantes e que, ademais, a tendencia é claramente descendente na maioría de áreas sanitarias. 

Nas que o descenso neste indicador non é tan claro nas últimas xornadas (A Coruña, Lugo e Ourense) o que se rexistran son treitos de estabilidade ou de lixeiros descensos. Ademais, entre estas tres, a que marca o nivel máis alto, Lugo, apenas supera os 30 casos novos por cada cen mil habitantes. Ourense queda nos 25 e A Coruña, nos 23. As outras catro roldan os 20 casos novos por cada cen mil habitantes.

O dato a 7 días baixa dos 24 casos novos por cada cen mil habitantes para o conxunto de Galicia e a incidencia acumulada a 14 días marca algo menos de 53. O feito de que o dato da última semana é menor á metade da cifra a 14 días evidencia tamén a liña descendente.

Outro indicador que reflicte a melloría epidemiolóxica para o conxunto do país é a coñecida como razón de taxas, isto é, a comparación da incidencia acumulada a 7 e 14 días coa do mesmo día da semana anterior. Cando a división de ambos indicadores é inferior a 1, reflicte que a incidencia diminúe e canto máis se aproxime ao cero, máis rápida é a mellora. Como amosa o gráfico baixo estas liñas, ambos indicadores están en zona de mellora e, ademais, é clara a aceleración da diminución da incidencia acumulada a 14 días.

Sobre o mapa, esta situación xeral reflíctese nun incremento no número de concellos que non rexistraron casos novos en 14 días (agora son 151) e tamén nun aumento dos municipios libres da COVID na última semana, que xa son 192. Mostra da mellor situación é tamén que nos concellos con máis incidencia acumulada a 14 días non cheguen aos 400 casos novos por cada cen mil habitantes e que as sete principais cidades estean xa por baixo dos 100 casos novos neste indicador. Nesta liña, dende este luns xa non hai ningún concello en nivel máximo de restricións, no que a Xunta contempla o peche perimetral, o veto ás reunións entre non conviventes e a clausura total da hostalería, entre outras medidas.

Mentres todo isto sucede, as cifras de mortalidade de persoas coa COVID empeoraron levemente durante a pasada semana, o que levou a que a media diaria de mortes oficialmente ligadas á pandemia sexa un chisco superior a 1 nos últimos sete días con datos completos. A tendencia, non obstante, segue contida e moi lonxe de anteriores vagas. O total destas mortes de persoas co coronavirus (non en todos os casos o falecemento é atribuíble directamente ao virus) é agora de 2.426.

Outro mínimo de hospitalización dende agosto de 2020

Mentres non sería correcto comparar mecanicamente os datos de casos novos rexistrados cada día cos da primeira e segunda vaga da pandemia sen termos en conta que a capacidade diagnóstica naqueles meses era moi inferior á actual, si é máis preciso para comparar ambas vagas observar -aínda que tamén con cautela- os indicadores de presión hospitalaria. E neste caso, os datos tamén din que a situación é a menos mala dende o verán do ano pasado.

As 83 persoas ingresadas con test positivo da COVID nos hospitais galegos son 42 menos que hai unha semana e a cifra total máis baixa dende o 24 de agosto de 2020. É significativo, ademais, que nesta última fin de semana as cifras de hospitalización de persoas coa COVID seguiron moderándose aínda que sexa habitual que os descensos sexan menores en sábado e domingo por tramitarse un menor número de altas. As persoas na UCI co coronavirus son agora 15, dez menos que hai unha semana.

Despece

  • Máis de 800.000 persoas vacinadas por completo en Galicia tras case 35.000 doses diarias nos últimos tres días

    A aceleración da vacinación contra a COVID, co impulso da chegada dun maior número de doses, segue evidenciándose nos datos de cobertura da inmunización a nivel estatal e tamén en Galicia. Na liña do que se albiscaba na información ofrecida polo Sergas, durante a pasada fin de semana volveuse experimentar un novo salto relevante tanto en termos cualitativos como cuantitativos no proceso de inmunización.

    Entre o venres, o sábado e o domingo, o Sergas administrou 104.485 doses de vacina. Dado que o Ministerio non divulga datos durante a fin de semana, é posible calcular un dato medio superior ás 34.800 doses ao día. Nas últimas sete xornadas con datos completos, en Galicia administráronse máis de 30.000 doses ao día, o que permite chegar xa a outro fito: máis de 800.000 persoas coa pauta vacinal completa (dúas doses en todas as vacinas agás na monodose de Janssen).

    Algo máis de 1,3 millóns de persoas xa recibiron en Galicia cando menos unha dose de vacina contra a COVID

    Son, en concreto, 800.572 as persoas que ata o domingo xa completaran a pauta de vacinación, algo máis dun terzo da poboación diana da campaña de vacinación, isto é, a maior de 16 anos. Mentres, xa son algo máis de 1,3 millóns as persoas que recibiron cando menos unha dose de vacina, algo máis do 56% da poboación diana cun avance que permite manter a previsión de que, na primeira quincena deste mes de xuño, máis da metade do total da poboación galega terá xa cando menos unha dose administrada.

    Nas últimas xornadas avanzou, sobre todo, o proceso de administración de primeiras doses a persoas de entre 50 e 59 anos. Tamén comezou a bo ritmo a vacinación ao grupo de entre 40 e 49 anos, que xa ten unha cobertura de case un 14% con cando menos unha dose (61.501 persoas) e de algo máis do 6% coa pauta completa (31.950).

    En termos globais, en Galicia xa se administraran ata o domingo algo máis de 2,06 millóns de doses de vacinas contra a COVID-19. Era o 95,4% das recibidas ata esa xornada (este luns, o Ministerio de Sanidade realizou un novo envío), uns cinco puntos por riba da media estatal.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza