O Sergas notificou este venres, 16 de xullo, 1.342 casos novos da COVID-19, os rexistrados dende as seis da tarde do mércores ata a mesma hora do xoves. É a cifra máis alta nun período de 24 horas coma este dende o 30 de xaneiro e supón que na primeira metade do mes de xullo detectou 11.258 positivos. No total dos dous meses anteriores, abril e maio, sumou 9.703 casos novos.
O Sergas rexistrou na primeira metade do mes de xullo case 11.300 casos, o groso concentrados nos grupos de idade máis mozos, aínda non incorporados á vacinación masiva. A suma dos meses de abril e maio quedou en 9.700
Este importante incremento achega a incidencia acumulada a 7 días aos 200 casos novos por cada cen mil habitantes e o dato a 14 días, aos 300 no conxunto de Galicia. O indicador máis inmediato, o da última semana, xa supera o da vaga do outono e o ritmo de crecemento é superior ao daquela.
Sendo todo isto certo, non o é menos que existe un factor diferencial a respecto de anteriores ondas da pandemia. O estoupido desta nova vaga produciuse entre os grupos de idade máis mozos, isto é, as persoas aínda non incorporadas á vacinación masiva. É nestes grupos nos que a incidencia acumulada iguala e mesmo supera o dato global galego posterior ao Nadal, cando Galicia chegou a rozar os 800 casos novos por cada cen mil habitantes.
Os datos divulgados polo Ministerio de Sanidade este venres (a hora de peche da información é diferente á do Sergas, de aí a lixeira diferenza nas cifras de incidencia), con datos do xoves, volveu acreditar esta circunstancia. Nos grupos de 12 a 19 e de 20 a 29 anos a incidencia acumulada a 14 días xa supera os mil casos novos por cada cen mil habitantes, con crecementos superiores aos 700 puntos en apenas unha semana.
No grupo de 30 a 39 anos, o que actualmente está inmerso na administración das primeiras doses dentro do proceso de vacinación masiva, este indicador está na contorna dos 400 casos e o crecemento é duns 200 puntos nunha semana. De 40 anos en diante, onde a cobertura con dúas doses supera o 80% no conxunto desta poboación, as incidencias acumuladas e os seus crecementos son máis baixas canto maior é a idade. O proceso de vacinación comezou, precisamente, pola poboación maior.
As áreas sanitarias de Ourense e Pontevedra, á cabeza da incidencia
Sempre coa notable diferenza de incidencias por idades como variable clave neste novo momento da pandemia, as incidencias tamén son dispares territorialmente. Así o amosan os datos por áreas sanitarias, aínda que en todas elas a tendencia sexa ascendente e coa carencia de que a Xunta non divulga os datos por idades en cada área -aínda que dispón deles-.
Como amosa o gráfico baixo estas liñas, a área sanitaria de Ourense segue encabezando a incidencia máis inmediata, a sete días, superando os 350 casos novos por cada cen mil habitantes tras rematar xuño con menos de 30. Tras ela sitúanse as áreas de Pontevedra-O Salnés (312) e Vigo (217). Na banda contraria, o dato máis baixo a sete días é o da área de Ferrol, con 107 casos novos por cada cen mil habitantes.
Malia aos incrementos dos últimos días, Sanidade decidiu este venres manter sen cambios o mapa de restricións que entra en vigor ás cero horas deste sábado, 17 de xullo
Estes datos estiveron este venres sobre a mesa do comité que asesora o Sergas a respecto das restricións pola COVID-19. Malia ao empeoramento nalgunhas áreas e concellos, Sanidade decidiu manter sen cambios o mapa de restricións que entra en vigor ás cero horas deste sábado, 17 de xullo, con sete concellos en nivel alto de restricións e outros 15 en nivel medio [podes consultar as restricións sobre o mapa, concello a concello, nesta ligazón] e a principal novidade de implantar, dende a semana que vén, a obriga de presentar certificado de vacinación ou de test negativo da COVID-19 para acceder a pubs e discotecas.
Catro dos sete concellos en nivel alto, o cal implica medidas como o peche do interior dos locais de hostalería, sitúanse na comarca do Salnés. Entre algúns destes municipios esténdese o malestar polo que consideran un agravio comparativo con outros concellos da zona. Así o expresou, por exemplo, o alcalde de Vilagarcía, Alberto Varela, quen se declarou "sorprendido" de que o concello vilagarcián, xunto con Vilanova, Cambados e A Illa queden en nivel alto "mentres outros municipios con maior incidencia están nun nivel máis baixo". Boa parte destes receos diríxense cara a Sanxenxo.
Incremento da hospitalización, pero aínda por baixo de anteriores vagas
As 96 persoas ingresadas con test positivo da COVID son 36 máis que hai unha semana
A baixa media de idade no groso das persoas que se están a infectar da COVID-19 está intimamente relacionada co feito de que o impacto desta vaga nos hospitais estea a ser moi inferior á das anteriores. Así e todo, os datos notificados este venres si amosan un incremento maior ao das xornadas previas: as 96 persoas ingresadas ás seis da tarde do xoves eran 17 máis que un día antes e 36 máis que a mesma xornada da semana anterior. Hai que remontarse ao pasado mes de febreiro para observar un incremento intersemanal semellante.
En calquera caso, a maior parte da presión desta nova vaga continúa situándose noutros puntos do sistema sanitario, nomeadamente na Atención Primaria e nos servizos de rastrexo. Non en van, os 8.319 positivos activos que se rexistraban ás seis da tarde do xoves eran 4.649 máis que hai unha semana.
