A TVG reduce o Telexornal e o comité alerta de máis peso dos programas externalizados

Inicio do Telexornal serán da TVG emitido o 1 de abril CC-BY-SA Praza.gal

Este primeiro de abril a TVG emitiu 14 minutos menos de informativos a modo de "experimentación", un axuste nos horarios que só afecta ao Telexornal serán e que responde "á necesidade de optimizar a grella e mellorar a estrutura dos contidos informativos nesta faixa horaria", segundo a información que desde a dirección da CRTVG trasladaron ao Comité intercentros.

Para a representación legal das traballadoras e traballadores esta redución do tempo de información na canle pública supón "un novo chanzo na escalada privatizadora que acabará por poñer en mans de terceiras empresas, de grandes grupos empresariais de comunicación, toda a emisión da CRTVG, cuxa produción propia interna está en niveis mínimos nunca vistos desde a creación dos medios públicos galegos".

A veterana xornalista Tareixa Navaza na concentración do persoal mobilizado da CRTVG canda Raquel Lema, presidenta do comité intercentros, o pasado decembro CC-BY-NC-SA Comité intercentros CRTVG

Dende o Comité explican que "o tempo que perde o telexornal vespertino de produción propia gáñano os programas Hora Galega, de Ficción Producciones (que veu cubrir o espazo antes ocupado polo programa de producción interna A Revista da Tarde e previamente outros como Galicia Serán), e Quen Anda Aí, de Tex 45 e Euro TV, que xa se emitían na faixa da tarde –consecutivamente– xusto antes do informativo".

O Comité alerta de que se está a "acelerar" a "cesión a terceiros" da produción, a realización e a edición dos espazos informativos

De outubro a decembro convocouse a primeira folga indefinida na CRTVG, que afectou á programación das mañás durante a emisión do programa externalizado O Termómetro. Agora a representación legal do persoal alerta de que se está a "acelerar" a "cesión a terceiros" da produción, a realización e a edición dos espazos informativos, para deixalos en mans de produtoras privadas "baixo a máscara do entretemento". Todo isto, inciden, provocará que estes programas informen "ao ditado que ordene quen lles paga, afondando aínda máis nas prácticas de manipulación informativa" que dende o comité denuncian hai anos.

Esta modificación na grella da TVG prodúcese sete días antes de que entre en vigor a nova lei dos medios públicos, aprobada polo Parlamento o pasado 11 de marzo, e que avala a cesión a terceiros dos servizos informativos, segundo salienta o Comité intercentros, que solicitou á dirección de Recursos Humanos da CRTVG unha "motivación detallada" das "razóns reais" da redución do tempo de produción propia interna no serán. 

Ademais, o Comité reclamou información sobre a afectación destes cambios nas condicións de traballo do persoal das quendas de tarde, pois temen a "adopción de medidas graves que impacten directamente sobre todo o cadro de persoal" se continúa o "baleirado constante da carga de traballo" tanto na TVG coma na Radio Galega. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.