Denuncian o "abandono do servizo público". O Comité destaca que a cobertura desta fin de semana obedeceu ao "mandato do goberno da Xunta de ocultar a gravidade da situación relativa aos incendios"
O Comité Intercentros da Corporación de Servizos Audiovisuais de Galicia (CSAG), a nova denominación dos medios de comunicación públicos –antes CRTVG–, denuncia que "os servizos informativos da radiotelevisión pública estiveron e aínda están desaparecidos do papel que deben xogar como primera fonte de información de servizo público da cidadanía galega nunha emerxencia como a que supoñen os maiores lumes da historia do país.
O ente que representa ás traballadoras e traballadores da TVG e da Radio Galega esixe "o cese de Alejandro López e Marta Darriba, director e subdirectora dos servizos informativos dos medios públicos, que consideran desautorizados", din nun comunicado, "para estar á fronte dunha equipa" que "estes días sentiu vergoña, impotencia e carraxe pola desidia e a irresponsabilidade dos seus superiores".
Critican que a "inacción deliberada" dos responsables dos informativos da CSAG puido vincularse coa "incompetencia" nun primero momento, mais no seu comunicado o Comité destaca que a cobertura desta fin de semana obedeceu ao "mandato do goberno da Xunta de ocultar a gravidade da situación relativa aos incendios".
A representación legal do persoal da CSAG urxe á directora xeral, Concepción Pombo, a "asumir en primeira persoa a xestión da crise"
A representación legal do persoal da CSAG urxe á directora xeral, Concepción Pombo, a "asumir en primeira persoa a xestión da crise" e pídelle que sitúe a "profesionais da redacción capaces de liderar a grave situación" no lugar dos directivos dos servizos informativos que reclaman cesar.
O obxectivo, sinalan no seu comunicado, é "recuperar o papel e a responsabilidade como servizo público dos informativos e do resto da programación", que consideran debe centrarse na crise incendiaria, "fornecéndolle á poboación minuto a minuto e desde todas as frontes a información de utilidade que precisa e demanda".
Piden "recuperar o papel e a responsabilidade como servizo público dos informativos e do resto da programación"
Para as representantes do comité de empresa da CSAG a cobertura desta vaga de incendios confirma as críticas que veñen realizando sobre o "desmantelamento" das delegacións territoriais da canle pública, pois "son os equipos de profesionais que coñecen o territorio os que mellor poden acceder e informar sobre o que pasa nel". Desta maneira, instan a que a TVG e a Radio Galega 'recuperen' o papel de servizo público.
