A Xunta adía o reinicio das clases presenciais na universidade pola COVID e mantén abertos escolas, colexios e institutos

Alumnado do colexio de Trabada con materiais de protección fronte á COVID, durante unha visita da alcaldesa da vila polo Nadal CC-BY-SA Concello de Trabada

Hemeroteca

As tres universidades galegas retomarán as clases o 8 de febreiro, tras o período de Nadal e dos exames -presenciais como norma xeral-, e farano, cando menos durante unha semana, a través de internet. É unha das restricións aprobadas pola Xunta este luns dentro do novo paquete de medidas contra a COVID-19, que serán publicadas no Diario Oficial de Galicia este martes, 26 de xaneiro.

Dentro das novas restricións da Xunta, as tres universidades retomarán as clases a través de internet o 8 de febreiro, inicialmente por unha semana

A restrición á presencialidade nas aulas universitarias -que os equipos reitorais das universidades de Santiago, A Coruña e Vigo xa están a comunicar ao profesorado e alumnado- non atinxe ao conxunto do ensino. Afirma Alberto Núñez Feijóo que, atendendo ás cifras de casos do coronavirus vinculados con colexios é institutos, é posible afirmar que "as aulas seguen sendo un lugar ben seguro" e, por este motivo, o Goberno galego non contempla activar, cando menos de momento, a opción non presencial.

Os datos máis recentes de casos activos da COVID-19 vinculados ao ensino (que non inclúen á universidade) son os divulgados pola Xunta o pasado sábado e ían na liña ascendente que veñen marcando dende despois das vacacións de Nadal. Os 2.754 positivos activos cos que finalizou a semana pasada nos centros educativos supuña outro máximo dende o inicio do curso, se ben a incidencia de casos activos sobre o total de profesorado e alumnado (unhas 300.000 persoas) veu sendo semellante ou mesmo inferior á do conxunto de Galicia.

Como no conxunto de Galicia, o número de positivos "activos" ligados aos centros de ensino aumentou en maior medida tras o Nadal

Á hora de ollar estes datos cómpre ter en conta, non obstante, que a liña da evolución dos casos de coronavirus vinculados ao ensino amosa só a foto fixa de cada xornada. Ao contrario do que sucede cos datos xerais, o Goberno galego non revela o número de altas que se producen entre alumnado e profesorado, polo que non é posible coñecer os casos novos e tampouco obter unha suma, un acumulado do total de positivos rexistrados no que vai de curso.

Durante o pico da pandemia do pasado outono, as aulas pechadas en Galicia apenas superaran as 70; agora, cos últimos datos da pasada semana, xa son case o dobre

A pasada semana foi tamén a que acadou un maior número de aulas co seu alumnado en corentena por mor da existencia de positivos da COVID-19, un total de 135. O anterior máximo rexistrárase en novembro, nas semanas de maior número de casos do coronavirus no conxunto de Galicia, e apenas superara as 70 aulas pechadas ao mesmo tempo. Tampouco neste indicador existe información pública que permita coñecer o número acumulado de aulas que tiveron que pechar por esta razón.

No remate do primeiro trimestre escolar, sindicatos do ensino, organizacións estudantís e asociacións de pais e nais asociaron a situación relativamente controlada da COVID-10 nas aulas ao "comportamento exemplar" do alumnado no cumprimento das medidas de seguridade. O sindicato maioritario do sector, CIG-Ensino, considerou que este comportamento, unido ás medidas adoptadas polo profesorado, compensaron o que consideran medidas "improvisadas" da Xunta e mesmo as súas "ordes contraditorias" cando se detecta un posible positivo.

Medición do nivel de CO2 nunha aula do IES Antón Alonso Ríos de Tomiño © IES Antón Alonso Ríos

Despece

  • Educación comunica aos sindicatos do ensino que escolas de idiomas e conservatorios tamén impartirán clase por internet polas novas restricións

    Escola Oficial de Idiomas de Lugo, nunha imaxe de arquivo CC-BY-NC-SA CIG-Ensino

    Poucas horas despois de que o presidente da Xunta, Alberto Núñez Feijóo, anunciase ante os medios o novo plan de restricións por mor do coronavirus, vixentes dende as cero horas do 27 de xaneiro, a Consellería de Educación convocaba "de urxencia" os sindicatos do ensino a unha videoconferencia. O obxectivo da xuntanza, encabezada polo conselleiro, Román Rodríguez, era -entre outros- comunicar que o ensino a través de internet non só será aplicado nas vindeiras semanas na universidade, como avanzou o presidente, senón tamén nas escolas de idiomas e conservatorios.

    Segundo o avanzado aos sindicatos, as clases por internet nestas ensinanzas tamén se prolongarán, cando menos, ata o 17 de febreiro

    O sindicato maioritario do sector, a CIG-Ensino, explica que, segundo o avanzado polo conselleiro, dende a entrada en vigor das novas restricións (o propio mércores, 27), vai quedar "suspendido o ensino presencial" nas escolas oficiais de idiomas e conservatorios profesionais de música e danza. Queda pendente coñecer, unha vez publicado o DOG, se isto sucederá tamén no resto de "centros que imparten ensinanzas superiores", como as escolas de artes e deseño.

    Suso Bermello (esquerda), secretario xeral da CIG-Ensino, nunha xuntanza da Consellería de Educación cos sindicatos do ensino sobre a COVID-19, na Cidade da Cultura en novembro de 2020 CC-BY-NC-SA CIG-Ensino

    Estes centros, daquela, pasarán dende esta semana ás clases a través de internet e a medida durará, como na universidade, cando menos ata o 17 de febreiro. "O profesorado que teña que impartir ensino virtual poderá facelo dende o centro de traballo ou dende o seu domicilio, sempre e cando se garanta a conectividade", explica a CIG-Ensino, recollendo información da Xunta.

    CIG-Ensino ve "desafortunado" manter o ensino presencial en colexios e institutos, cando menos nas localidades con maior incidencia do virus 

    A xuízo desta organización sindical, "todo parece indicar que a decisión de non estender a suspensión do ensino presencial no resto das etapas educativas obedece a criterios non só educativos nin sanitarios, senón esencialmente á conciliación da vida laboral e familiar" e isto, cren, é "desafortunado". "Como defensora da presencialidade, mais con todas as medidas de seguridade, a CIG-Ensino entende que en situacións excepcionais deben adoptarse medidas á mesma altura", cando menos, cren, en "localidades cun descontrolado aumento dos casos" da COVID-19.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza