A Xunta vetará a publicidade de xogo e apostas en todos os medios agás nos xornais impresos

Protesta contra a apertura dun local de apostas no barrio vigués de Navia CC-BY-NC-SA PCG

Hemeroteca

A Xunta expuxo este luns na Comisión do Xogo de Galicia o "borrador" da lei que, cando estea aprobada, substituirá a regulamentación que rexe este sector no país dende 1985. Os membros deste órgano, ata agora conformado por representantes do propio Goberno galego e das empresas de casinos, bingos e máquinas recreativas, recibiron a versión preliminar dun texto ao que aínda non accedeu "formalmente" a oposición parlamentaria e que incluirá, entre outros aspectos, novos límites para a publicidade do xogo e das apostas, aínda que máis ou menos rigorosos en función do soporte.

A Xunta avanza que cando entre en vigor a nova lei do xogo "só se permitirá a publicidade" destes negocios "en prensa escrita" e baixo "supostos concretos"

O texto no que traballa o Executivo galego non foi divulgado de xeito público ata este luns, a propia Xunta ofreceu diferentes avances do seu contido en días previos. Na véspera do encontro da devandita comisión a Vicepresidencia, órgano que impulsa a lei, avanzou que "a regulación da publicidade será" unha "das grandes apostas destas nova lei". Segundo o avanzado, quedará vetada en todos os medios cunha excepción: os xornais impresos.

Será un regulamento posterior á lei o que sinale de xeito "específico" como e onde se poden anunciar os negocios de xogo de azar e apostas en Galicia, pero a lei xa "determina" os seus aspectos xerais. Concretamente, di a Xunta que "dentro das súas competencias" só "se permitirá a publicidade en prensa escrita", o que semella unha referencia aos xornais impresos, e "limitada a supostos concretos e taxados na norma". Tamén poderá haber publicidade nos "locais específicos de xogo". Quedaría, daquela, vetada nos demais soportes.

Atendendo ao texto publicado no Portal de Transparencia da Xunta este 3 de xuño, os xornais impresos poderán continuar publicando "publicidade de xogos de carácter meramente informativo". Ata que exista o devandito regulamento específico, entenderanse por "meramente informativos" os anuncios co emprazamento, horario e actividades que ofrecen os diferentes locais. En radio e televisión a prohibición afectará aos "espazos especialmente dirixidos ao público infantil". Alén disto, remítese a normativa xeral sobre publicidade. 

Fóra dos medios, o bosquexo da lei tamén se remite ao futuro regulamento no que atinxe a algúns dos soportes publicitarios máis controvertidos para as apostas. Así, indica que "a publicidade, promoción e patrocinio e calquera forma de comunicación comercial das actividades de xogo estará suxeita a autorización previa" segundo os "termos e condicións" que fixe ese desenvolvemento regulamentario..

Xuntanza da Comisión do Xogo, este 3 de xuño, presidida polo director xeral de Emerxencias e Interior da Xunta CC-BY-SA Xoán Crespo / Xunta

Novas distancias entre locais e limitación de máquinas

Sempre segundo os avances divulgados pola Xunta, a nova lei "ampliará, na práctica", as distancias físicas esixidas para abrir locais dedicados ás apostas e ao xogo de azar en xeral. Así, por exemplo, os 150 metros que, como mínimo, deben separar estes establecementos dos "centros escolares con menores de idade" pasarán a calcularse de maneira "radial" e non "tendo en conta as vías que usaría unha persoa para ir andando dun punto a outro", polo que "na práctica, a distancia será maior".

Nesta liña, os 300 metros que ata agora son esixidos entre establecementos de xogo do mesmo tipo -por exemplo, entre unha tenda de apostas e a seguinte- pasarán a ser obrigatorios para "calquera tipo de establecemento de xogo". Deste xeito, "un salón de xogo terá que estar, como mínimo, a 300 metros de distancia doutro salón de xogo", con independencia da modalidade específica que ofreza.

A previsión da Vicepresidencia é que coa nova lei só poida haber en Galicia 118 salóns de xogo e 41 locais de apostas, os que agora están xa abertos ou en trámite

Vicepresidencia adianta tamén que "outra das principais novidades será a limitación tamén do parque de máquinas recreativas e de máquinas de apostas". A diferenza a respecto da actual normativa é que "actualmente, cando unha máquina se daba de baixa definitiva, podían autorizarse novas ata chegar ao límite establecido", pero coa nova lei, as máquinas que sexan dadas de baixa "irán reducindo o límite máximo na proporción correspondente e non se poderán dar novas autorizacións".

Cando a nova lei chegue ao Parlamento a cidadanía poderá coñecer integramente un texto durante cuxo trámite a Xunta impuxo unha moratoria de nove meses á apertura de novas tendas de apostas. A intención deste veto temporal, indica a Xunta, é "evitar especulacións antes da entrada en vigor do novo texto normativo" que, asegura, limitará o número de salóns de xogo e de locais de apostas "aos que xa existen e aos que están en tramitación", é dicir, 118 salóns de xogo e 41 locais de apostas.

Despece

  • «A ningúen lle gustan as casas de apostas e que se aproveiten da xente que ten menos recursos», di Dani Giménez, porteiro do Deportivo

    Dani Giménez, porteiro do Deportivo © RCDeportivo

    Miguel Pardo

    Xusto  o día na que a Xunta expuxo na Comisión do Xogo de Galicia o "borrador" da lei que substituirá a regulamentación que rexe as empresas deste sector no país desde 1985, unha voz alzouse con inusual claridade e contundencia sobre as casas de apostas.

    Inusual por chegar do mundo do fútbol, onde esas compañías acumulan importantes ingresos e acordos publicitarios, pero tamén por saír da boca dun futbolista e un dos capitáns do Deportivo, conxunto que, como a inmensa maioría ten un acordo publicitario cunha casa de apostas, neste caso a galega Luckia. 

    "A ningúen lle gustan as casas de apostas, que estean nos barrios obreiros e que se aproveiten da xente que ten menos recursos"

    Foi o vigués Dani Giménez, porteiro deportivista, quen falou do tema tras reflexionar sobre a situación do seu compañeiro Íñigo López, un dos detidos na operación que descubriu unha presunta rede de amaños de partidos vinculados aos beneficios das casas de apostas chinesas. 

    "As casas de apostas son poderosas, por chamalas dalgunha maneira. Teñen un poder que están conseguindo cada vez máis por culpa da xente que move isto", explicou. "A ningúen lle gustan as casas de apostas, a ninguén lle gusta que estean nos barrios obreiros e que se aproveiten da xente que ten menos recursos, pero ao final patrocinan equipos, patrocinan competicións... Esperemos que non sexa demasiado tarde cando nos decatemos de que non deberían ser así as cousas", reflexionou. 

    "As casas de apostas patrocinan equipos, patrocinan competicións... Esperemos que non sexa demasiado tarde cando nos decatemos de que non deberían ser así as cousas"

    Dani Giménez, un dos capitáns do equipo coruñés, fixo estas declaracións malia que a casa de apostas galega Luckia é un dos patrocinadores do Deportivo. A empresa --que tamén patrocinou o Celta-- e a entidade branquiazul asinaron un acordo xa no ano 2016 para logo ampliar a súa vinculación no pasado verán ata o ano 2021. 

    As declaracións referidas ás casas de apostas de Dani Giménez foron recollidas, ademais, no no vídeo completo que o Deportivo difundiu de todas as palabras do porteiro galego respecto a diferentes temas.  

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza