Unha representación de ADEGA, encabezada polo seu presidente Roi Cuba mantivo un encontro este sábado con Malte Galle, eurodiputado da Comision de Medio Ambiente e a Ana Miranda, eurodeputada do BNG
Unha representación de ADEGA, encabezada polo seu presidente Roi Cuba mantivo un encontro este sábado con Malte Galle, eurodiputado da Comision de Medio Ambiente e Ana Miranda, eurodeputada do BNG, aos que demandou un endurecemento das normas contra a contaminación por plásticos co obxectivo de atallar novas crises ambientais provocadas por estes contaminantes.
No encontro, que tivo lugar na praia de Nerga (Cangas), participou tamén a alcaldesa deste concello, a nacionalista Araceli Gestido. Os membros do Parlamento Europeo puideron comprobar o desenvolvemento dos traballos de limpeza neste areal por parte do voluntariado coordenado por ADEGA.
As demandas de ADEGA refírense á adopción de medidas a todos os niveis, dende o estritamente galego e estatal, ata o ámbito europeo e tamén o mundial, buscando reducir a incidencia dos accidentes marítimos sobre os ecosistemas costeiros e os recursos mariños.
As demandas de ADEGA refírense á adopción de medidas a todos os niveis, dende o estritamente galego e estatal, ata o ámbito europeo e tamén o mundial, buscando reducir a incidencia dos accidentes marítimos sobre os ecosistemas costeiros e os recursos mariños
A nivel galego, reclaman a mellora do plan CAMGAL contra a contaminación mariña accidental, aprobado pola Xunta. A entidade ecoloxista demanda, sobre todo, a súa activación rápida "para poñer en marcha as medidas precisas e evitar que a contaminación chegue á costa, xa que despois é moito máis difícil actuar contra ela". ADEGA tamén critica que non designe portos refuxio ou que a súa activación dependa dunha decisión política e non a circunstancias obxectivas. Así mesmo, pídese que a información pública sobre accidentes/incidentes marítimos e a previsión/evolución dos posíbeis vertidos e zonas afectadas estea dispoñible permanentemente para o público en tempo real.
ADEGA reclama a mellora do plan CAMGAL contra a contaminación mariña accidental, sobre todo no que atinxe á súa activación rápida
No ámbito estatal, indica ADEGA, a resposta contra unha vertedura e a coordenación dos medios "sería máis efectiva se dependera da administración autónoma e non do Ministerio" e lembra que as competencias en vixilancia e salvamento marítimo non están transferidas a Galicia, "o que introduce un chanzo administrativo máis na cadea de decisións que debería ser o máis curta posíbel, alén de supoñer unha fonte de posíbel liorta política, como foi o caso".
A nivel estatal, demanda a transferencia a Galicia das competencias en vixilancia e salvamento marítimo
No plano europeo, cómpre que actuar en dúas direccións, sinala a entidade: a nivel ambiental, desenvolvendo un regulamento que considere a estes materiais (pellets e granzas plásticas) como substancias contaminantes no transporte mariño, pois neste momento non o son, de cara a tomar medidas na súa manipulación, tratamento e envasado. Ademais, polo que atinxe ao transporte, pide establecer "medidas máis estritas de control no seu trafego para evitar no posíbel perdas accidentais".
No plano internacional, esixe que estes materiais (pellets e granzas plásticas) sexan consideradas substancias contaminantes no transporte mariño, para que as condicións de empaquetado e manipulación fosen máis estritas
Finalmente, a nivel internacional ADEGA subliña que sería importante que a OMI (Organización Marítima Imternacional, dependente da ONU) modificara o convenio MARPOL para asignar aos precursores plásticos en forma de pellet, escama ou pó a categoría de mercadorías perigosas, para que tanto no empaquetado (máis resistente á rotura) como no etiquetado, carga, estiba e manipulación as condicións foran máis estritas. A entidade denuncia que este asunto comezou a discutirse nun comité de traballo en 2021 "e aínda non se resolveu debido ás reticencias da industria química e as compañías de transporte marítimo".
