"Desobediencia ou resistencia á autoridade ou aos seus axentes no exercicio das súas funcións (...), así como a negativa a identificarse a requirimento da autoridade ou dos seus axentes ou a alegación de datos falsos ou inexactos nos procesos de identificación".
Este artigo da lei 4/2015 de seguridade cidadá, coñecida como lei mordaza, foi o argüído por varios axentes da Policía Nacional para sancionar un veciño de Lugo con 601 euros por unha infracción "grave". Segundo a notificación remitida pola Subdelegación do Goberno o pasado mes de febreiro, a persoa sancionada teríase negado a identificarse e a abandonar o lugar dos feitos "en actitude desafiante", motivo polo cal lle foi imposta a multa.
A Delegación do Goberno arquiva unha sanción por infracción grave derivada dunha denuncia de varios axentes contra un veciño de Lugo
O afectado, que asegura que a motivación real da sanción -"camuflada baixo outro pretexto"- foi tratar de ti no canto de vostede a un axente, recorreu pola vía administrativa unha multa que vén de ser arquivada pola Delegación do Goberno: "Os feitos denunciados pola forza actuante non aparecen suficientemente probados no expediente".
Eses feitos aconteceron hai case un ano, en agosto de 2021 na rúa Raíña de Lugo, cando o afectado accedeu a varios axentes que identificaban un malabarista coñecido seu para interesarse pola súa situación. Segundo o afectado, e polas imaxes do vídeo que achegou nas alegacións como proba, un dos axentes recoñece que o vai sancionar "por falta de respecto a axente da autoridade".
O afectado e o vídeo que achega indican que o motivo da denuncia foi tratar de "ti" e non de "vostede" a un axente e non desobediencia ou negativa a identificarse
"Por que? Por tratalo de ti en vez de de vostede? Cal é o motivo da denuncia", pregunta o veciño, como se pode apreciar no vídeo. "Falta de respecto porque vostede tenme que tratar de vostede", responde o axente.
Segundo denuncia este home, na denuncia que asinan tres axentes de policía asegúrase que se nega a identificarse "en reiteradas veces", algo que, tal e como argumenta, non ocorre en momento ningún. E fai referencia ao vídeo, que tamén é tido en conta pola propia Delegación do Goberno no estudo das alegacións.
Malia o arquivo da denuncia -ao que tivo acceso Praza.gal-, este veciño de Lugo decidiu daquela interpoñer tamén unha denuncia contra os tres axentes da Policía Nacional ao considerar que "deberían ser sancionados por actuar con mala fe e mentindo". A demanda foi arquivada en primeira instancia por non estar "debidamente xustificada" a comisión dun delito, aínda que o afectado decidiu interpoñer un recurso de apelación ante a Audiencia Provincial do que está á espera.
O home lembra que xa en 2019 fora sancionado pola Garda Civil durante unha concentración contra as touradas en Sarria por suposta "desobediencia e negativa á identificación". Tamén naquel caso, a multa foi recorrida e unha sentenza ordenara a devolución dos cartos ao sancionado. "Como ocorre agora, aquel axente non sufriu ningún tipo de prexuízo, apercibimento ou sanción, actuando con total impunidade", denuncia.
"O da lei mordaza é tremendo, máis aínda que as sancións sexan tan altas e que teñas que recorrelas ante o mesmo órgano que te sanciona", explica en Praza.gal o afectado, que prefire manter o anonimato e explica que é "difícil que sexan arquivadas estas multas a non ser que teñas unha proba moi obvia e evidente, como neste caso o vídeo ou o testemuño de varias persoas".
