70 servizos veranse afectados e Renfe habilitará máis de 250 autobuses, microbuses e taxis
As obras de construción da nova estación intermodal da Coruña que están en marcha implican tamén a renovación dos sistemas de sinalización e seguridade ferroviaria. Os novos sistemas serán probados por Adif durante a fin de semana do 21 e 22 de setembro, o que afectará ao tráfico ferroviario entre A Coruña e Santiago e entre A Coruña e Betanzos cara a Ferrol. Unhas interrupcións que obrigarán a Renfe a habilitar máis de 250 servizos de autobús alternativos entre as estacións de Santiago, A Coruña e Ferrol.
Segundo informa a operadora pública, os desvíos por autobús afectarán xa a "algúns servizos do venres día 20 a última hora e o luns 23 a primeira". Deste xeito, veranse afectados catro servizos Alvia Madrid-Ferrol, catro Alvia Ferrol-Madrid, un AVE Madrid-A Coruña e outro AVE A Coruña Madrid. Canto aos Avlo de baixo custo, Renfe pasará a operar en Vigo con paso por Santiago os catros servizos entre A Coruña e Madrid, dous de ida e dous de volta, previstos para eses días.
No que respecta aos servizos Avant, rexionais e de Media Distancia serán 52 os afectados, segundo a lista facilitada por Renfe, desde o Rexional Vigo Guixar-A Coruña con saída o venres 20 ás 20.28 horas ata o Avant A Coruña-Ourense con saída o luns 23 ás 7.06 horas.
