Este sábado e domingo, a Organización galega de Comunidades de Montes (ORGACCMM) e a Federaçao Nacional de Baldíos-BALADI celebraron, en Mos o IV Congreso europeo de Áreas Comunitarias
As comunidades de montes galegas e os baldíos portugueses son dúas fórmulas de propiedade da terra e da xestión do territorio análogas, ambas as dúas titularidades de orixe xermánica, terras indivisibles e intrasferible e polo tanto situadas fóra do tráfico do mercado. Ademais, están xestionadas democraticamente pola veciñanza comuneira galega e os compartes portugueses, que conforman as asembleas que rexen estas áreas forestais. Con problemáticas e retos comúns, as comunidades galegas e os baldíos lusos celebraron esta fin de semana un encontro de irmanamento que servirá para unir forzas.
Este sábado e domingo, a Organización galega de Comunidades de Montes (ORGACCMM) e a Federaçao Nacional de Baldíos-BALADI celebraron, en Mos o IV Congreso europeo de Áreas Comunitarias. As actividades do congreso tiveron lugar no centro social As Pedriñas da Comunidade de Montes de Tameiga.
“Novas economías verdes en areas comunitarias: espazo de oportunidades ou risco anunciado” foi o lema que presidiu este congreso
O Congreso europeo de Áreas Comunitarias está destinado especialmente para a participación das comunidades de montes veciñais galegas e as asembleas de compartes portuguesas. Participaron, ademais, entidades de diversa índole que viven, traballan o xestionan o medio rural, así como profesionais relacionadas co medio rural e co monte veciñal. Tamén asistiron organizacións ecoloxistas e ambientais de Galicia e Portugal.
“Novas economías verdes en areas comunitarias: espazo de oportunidades ou risco anunciado” foi o lema que presidiu este congreso. Nas charlas e mesas do encontro debateuse o papel a desenvolver polas áreas comunitarias na transición enerxética e, ademais, como facer fronte á "presente ameaza da vaga de acaparación das terras comunitarias impulsada pola economía capitalista e auspiciada por algunhas administracións".
A ORGACCMM denuncia que "a estratexia do capitalismo é a acaparación das terras e, con ela, o espolio dos recursos que nelas se dan: vento, auga, minerais, producións agro-gandeiras…"
Neste senso, a Organización galega de Comunidades de Montes denuncia que "a estratexia do capitalismo é a acaparación das terras e, con ela, o espolio dos recursos que nelas se dan: vento, auga, minerais, producións agro-gandeiras…". A entidade lembrou que as comunidades tamén sofren "intentos de acaparación de terras para a construcións de urbanizacións de luxo, campos de golf, centros comerciais ou cidades deportivas de clubes privados, coma no caso dos montes veciñais de Tameiga".
No Congreso reivindicouse que a UE recoñeza esta titularidade veciñal e comunal para que conste esta especificidade na súa política agraria medioambiental e de desenvolvemento rural
Dentro do territorio da Unión Europea, os montes veciñais galegos e os baldíos portugueses son o único exemplo de titularidades comunitarias e veciñais. No Congreso reivindicouse que a UE recoñeza esta titularidade veciñal e comunal para que conste esta especificidade na súa política agraria medioambiental e de desenvolvemento rural.
“Para parar esta agresión ás terras comunitarias, a veciñanza comuneira ten que conquerir que as lexislacións reforcen o carácter xermánico dos montes veciñais e que se recoñezan a estes como titularidades distintas e en pé de igualdade coas titularidades privada e pública actualmente existentes”, sinalou Xosé Pereira, presidente da ORGACCMM.