A Audiencia de Pontevedra salienta "os contundentes datos que corroboran a versión das menores", incluídas gravacións de cámaras de seguridade
A Sección Quinta da Audiencia Provincial de Pontevedra, con sede en Vigo, vén de condenar a trece anos e medio de prisión a un home acusado de agredir sexualmente nesa cidade a dúas menores da súa congregación relixiosa, Testemuñas de Xehová. O tribunal considérao autor de tres delitos de agresión sexual sobre menores de 16 anos, polos que tamén lle impón o pago dunha indemnización a unha das vítimas de 10.000 euros e, á outra, de 4.000 euros.
Os maxistrados consideran probado na sentenza que o condenado aproveitou a relación de amizade que mantiña coa familia dunha das vítimas para gañarse a súa confianza e cometer os feitos entre finais de 2023 e abril de 2024. Segundo a sentenza, o home facía agasallos ou entregaba cartos ás vítimas.
O tribunal sustenta a súa decisión condenatoria nas declaracións das dúas menores, consideradas verosímiles e consistentes, as cales foron corroboradas por testemuñas, informes periciais, mensaxes de WhatsApp e imaxes de cámaras de videovixilancia dun centro comercial da cidade e varios aparcamentos.
"Ningunha dúbida ten este tribunal da veracidade dos feitos", di a Audiencia
"Ante os contundentes datos que corroboran a versión das menores ningunha dúbida ten este tribunal da veracidade dos feitos que se declaran probados", salienta a sentenza, que non é firme pois pode ser recorrida ante o Tribunal Superior de Xustiza de Galicia (TSXG).
