A última semana deixa máis de 60 aulas pechadas en toda Galicia tras catro semanas por baixo de 50
Os casos activos de coronavirus vinculados con centros educativos (non os novos positivos, dato que non ofrece a Xunta) rexistraron un estancamento e mesmo un lixeiro empeoramento na última semana tras as cinco semanas previas de progresivo descenso, en liña co empeoramento xeral das cifras da pandemia en Galicia dúas semanas despois da desescalada nas restricións que se comezou a aplicar xusto antes da ponte de comezos de mes. Os algo menos de 900 casos activos que se rexistraron nos últimos cinco días lectivos contrastan cos 1.300 que había a comezos de decembro, pero a cifra deixou de baixar ao ritmo que o viña facendo.
Canto ás aulas, este venres eran 66 as pechadas en toda Galicia, cifra que contrasta coas menos de 50 que se rexistraban nas catro semanas anteriores.
Hai tres escolas infantís pechadas en Vigo, Pontevedra e Lugo e o centro con máis casos é o CPR Plurilingüe La Grande Obra de Atocha da Coruña, con 24
Por centros educativos, só tres están pechados por completo, tres escolas infantís, de dimensións máis reducidas que outros centros, de Vigo, Pontevedra e Lugo. Por total de casos activos, o centro máis afectado é o CPR Plurilingüe La Grande Obra de Atocha da Coruña, con 24 casos, mentres que por aulas é o IES Plurilingüe Pedra da Aguia de Camariñas o que ten máis pechadas, cinco.
