Con máis de 35.000 consultas suspendidas desde que comezara a folga indefinida na atención primaria e con cada vez máis persoal médico negándose a facer peonadas reclamando á Xunta que "negocie" para poñer fin ao paro, a situación da sanidade pública continúa a empeorar en Galicia.
Persoal de xinecoloxía e de cirurxía vascular e pediátrica do CHUS únese á negativa a facer 'peonadas' de profesionais do Salnés, Pontevedra e Vigo
A batalla aberta entre o Sergas e o sindicato médico O'Mega —convocante da actual folga en centros de saúde e nos PAC e de anteriores polo Estatuto Marco— non cesa. Logo de que o pasado luns a organización anunciase que a maioría de cirurxiáns e anestesistas dos hospitais de Vigo e Pontevedra decidiran deixar de realizar estas peonadas mentres se mantivese o paro, desta vez son "a maior parte" dos facultativos dos servizos de xinecoloxía, cirurxía vascular e cirurxía pediátrica do CHUS de Santiago os que están a comunicar mediante escritos ás respectivas xerencias que non levarán a cabo estes labores voluntarios fóra do seu horario.
Estas actividades extraordinarias voluntarias —de autoconcertación ou actividade deslizada— son as que realizan numerosos médicos do Sergas para reducir as listas de espera, especialmente en cirurxía, polas tardes e fóra do seu horario habitual ordinario. "As consecuencias son gravísimas", deslizan fontes sindicais ao advertir do impacto que esta protesta está a ter no Sergas e á que se unirá persoal de cirurxía doutros moitos hospitais galegos nas próximas horas.
O persoal mobilizado pide "condicións laborais dignas" e advirte de que seguirá sen facer 'peonadas' mentres non se desconvoque a folga
A decisión de negarse a realizar as peonadas chegou logo de que o conselleiro de Sanidade, Antonio Gómez Caamaño, manifestase recentemente que eran estas actividades extraordinarias as que permitían ao Sergas recuperar a actividade perdida durante a folga. "Isto desencadeou o malestar dos facultativos, que non queren converterse nun parche ás suspensións derivadas do dereito á folga", explica O'Mega.
O persoal que se une agora á protesta di que o fai "no actual contexto de mobilizacións convocadas polo colectivo médico en defensa dunhas condicións laborais dignas e acordes coa responsabilidade inherente á nosa profesión, e en consonancia cos motivos que fundamentan as folgas autonómicas e nacionais".
"Non somos un parche"
Segundo O'Mega, o último en unirse foi persoal do CHUS, cun seguimento desta medida de protesta do 100% en cirurxía pediátrica e do 90% en cirurxía vascular e xinecoloxía e obstetricia. Os profesionais explican nos seus escritos ás xerencias que "non desexan ser utilizados como parche para solucionar as suspensións de actos clínicos derivados destas folgas" e instan a Consellería de Sanidade a "negociar para permitir a súa desconvocatoria". Antes deles decidira rexeitar as peonadas persoal servizo de anestesia de Pontevedra, ao que se uniu logo persoal do Salnés, dos servizos de anestesia e cirurxía de Vigo e dos de neurocirurxía e cirurxía vascular de Santiago
O Sergas reúnese co persoal mobilizado e O'Mega acúsao dun "intento pueril de dividir o colectivo": "Non terá éxito porque cada vez son máis médicos os que se unen"
Precisamente, a Consellería está a citar algúns destes especialistas que se negan a facer peonadas para intentar convencelos de desistir da protesta, aínda que sen éxito. Segundo O'Mega, as reunións son "un intento pueril de dividir o colectivo que dificilmente terá éxito porque cada día son máis os servizos de distintos hospitais que optan por deixar de facer estas actividades extraordinarias ata que a Xunta negocie cos seus representantes o final destas folgas".
Ao tempo, continúa a folga convocada por O'Mega na atención primaria e que, segundo o Sergas, tivo un seguimento na quenda de mañá deste mércores inferior ao 4%, unha porcentaxe que o sindicato adoita situar no 70%. Nas sete primeiras xornadas de folga, segundo Sanidade, suspendéronse 34.942 consultas en Galicia.
