O Estado constata que a Liga coñeceu o brote do Fuenlabrada antes de viaxar e A Coruña leva o caso á Fiscalía

O presidente da Liga, Javier Tebas (dereita), coa secretaria de Estado para o Deporte, Irene Lozano, e o presidente da Federación Española de Fútbol, Luis Rubiales, nunha imaxe de arquivo © CSD

Hemeroteca

A Liga de Fútbol Profesional sabía "o domingo ás 22h30" que o Club de Fútbol Fuenlabrada sufrira un brote de coronavirus no seu persoal. Concretamente, "tanto o club como La Liga coñeceron o primeiro positivo o sábado, 18 de xullo, ás 22h30" e vinte e catro horas máis, constataron a existencia de "tres positivos máis". Ou, o que é o mesmo, coñecían que superaran o limiar -tres casos- fixado polo Ministerio de Sanidade para identificar un brote da COVID-19 cando menos doce horas antes de voar á Coruña para xogar contra o Deportivo. Estes feitos van ser trasladados á Fiscalía este propio xoves polo Concello coruñés.

O Consello Superior de Deportes asegura que a Liga soubo "o domingo ás 22h30" da existencia dun brote de coronavirus no Fuenlabrada, que viaxou igualmente o luns á Coruña para enfrontarse ao Deportivo

Esta é unha das conclusións que o Consello Superior de Deportes, órgano dependente do Goberno de España, revelou este martes nunha nota oficial citando un informe solicitado polo propio Executivo á patronal do fútbol profesional sobre o brote de coronavirus importado a Galicia. A normativa vixente fronte á pandemia, evidencia o CSD, estipula que "en caso de brote, débese comunicar inmediatamente ás autoridade sanitarias", no seu caso a Consellería de Sanidade da Comunidade de Madrid, pero esta "non foi informada", admitiu a propia Liga ao CSD.

O Executivo madrileño admitía o propio mércores que, como o Servizo Galego de Saúde, non recibiron notificación dos positivos do Fuenlabrada ata "última hora" do luns. Isto é, cando o persoal do Fuenlabrada xa levaba varias horas na Coruña e cando o partido en Riazor xa fora suspendido por mor dos positivos. "Ante a aparición dun brote, o equipo non debeu viaxar o luns, por un principio elemental de prudencia", considera o CSD, mesmo "no caso de que sexa certo", como mantén o Fuenlabrada, que as probas CPR "practicadas o mesmo domingo" ao resto do equipo "deran negativos".

As redes sociais do Fuenlabrada recollen imaxes da súa viaxe en avión á Coruña CC-BY-NC-SA Praza Pública

O CSD considera que a viaxe do equipo a Galicia "puxo en risco" a saúde pública e fai "responsable" á Liga de "garantir" que os equipos cumpren os protocolos fronte á COVID-19

"Cometeuse un grave erro ao emprender a viaxe", asegura o Consello, quen defende que os xogadores pendentes de resultado das probas e que coñeceron os positivos cando xa estaban na Coruña "deberon quedar illados" en Madrid ata saber se padecían ou non a COVID-19. "A actuación do CF Fuenlabrada -continúa o CSD- puxo en risco a saúde dos seus xogadores, a saúde pública e a competición" nun contexto no que o departamento estatal introduce tamén un matiz: "o responsable de aplicar correctamente os protocolos é o club e o responsable de garantir que así se fai é La Liga". 

Eses protocolos, explica o Consello, recollen que "en caso de detectarse un positivo" no seo dun equipo, deben ser realizadas probas "a todo o grupo de adestramento, así como ao corpo técnico ou persoal co que tivese contacto", ficando "afastados ata a obtención de resultados". Por todo isto, o CSD "solicita" á Liga e á Federación Española de Fútbol que "estuden" o acontecido e "apliquen as medidas que consideren oportunas para evitar que un incidente semellante volva repetirse".

O Concello da Coruña, á Fiscalía

O goberno local coruñés pide ao Ministerio Público aclarar se "estamos ante unha conduta imprudente con risco exponencial para a saúde pública" e se os feitos son "constitutivos de delito"

O departamento de Deportes do Goberno de España non anuncia, cando menos no devandito comunicado, medidas adicionais que si confirmaba este mércores o Concello da Coruña. A alcaldesa da cidade, Inés Rey, prevé "poñer en coñecemento do fiscal xefe da Audiencia Provincial" todo o acontecido por se os feitos "fosen constitutivos de delito".

"Existen -explica o Concello- indicios de coñecemento por parte das persoas responsables da Liga" da "existencia de positivos de membros do club Fuenlabrada antes de emprenderen a súa viaxe" á Coruña. "De ser certo", abondan, "estaríase incorrendo por parte da Liga de Fútbol nunha conduta imprudente". Por iso, a petición do Concello ao Ministerio Público tratará de "esclarecer" se "estamos ante unha conduta imprudente con risco exponencial para a saúde pública".

Inés Rey, alcaldesa da Coruña, o pasado 21 de xullo en rolda de prensa © Concello da Coruña

O Concello cre que a "ausencia de comunicación" do brote ata o serán do luns "impediu adoptar as medidas de illamento por parte das autoridades sanitarias"

Concretamente, o goberno local coruñés quere que a Fiscalía ratifique o momento exacto en que o Fuenlabrada comunicou os positivos á Liga e "investigue a ausencia de comunicación" por parte da propia patronal do fútbol "dos contaxios ás autoridades sanitarias de Madrid e Galicia". Para isto, pide que o fiscal solicite á Xunta "información sobre as probas" realizadas aos xogadores xa na Coruña e que confirme a hora en que a Liga informou o Sergas sobre o que estaba a acontecer.

"Os indicios e feitos que imos coñecendo acreditan un comportamento absolutamente imprudente e neglixente por parte da Liga, que creou un risco sanitario evidente ao non comunicar inmediatamente o foco de contaxio". Esa tardanza, coida a rexedora, "impediu que se adoptasen as medidas de illamento por parte das autoridades sanitarias".

Despece

  • Cinco casos máis de coronavirus entre o persoal do Fuenlabrada na Coruña

    Xogadores do Fuenlabrada, chegando a Alvedro o pasado luns, día 20 © CF Fuenlabrada

    O Club de Fútbol Fuenlabrada confirmou na tarde deste xoves, 23 de xullo, ata media decena máis de positivos no brote de coronavirus importado á Coruña pola expedición desta sociedade anónima deportiva. Nun comunicado, o club admite "catro casos máis da COVID-19" ao que se engade un quinto test sen resultado "concluínte" a un membro do equipo que, non obstante, "presenta síntomas.

    Sanidade eleva xa a 12 as persoas contaxiadas na expedición que permanece no coruñés Hotel Finisterre e acusa á Liga e ao Fuenlabrada de "reincidir" no incumprimento dos protocolos sanitarios fronte á COVID-19

    Recoñece ademais a entidade que están aínda pendentes de "confirmación" novos test realizados polas autoridades sanitarias galegas "no día de hoxe". Mentres, "o número de contaxiados na expedición" que segue illada no hotel Finisterre da Coruña "ascendería a 10", once contando o  "non concluínte". Engádense ás "catro persoas que quedaron en Madrid" e que tamén deran positivo, recoñecen.

    Tras a publicación deste comunicado, a Consellería de Sanidade amosou o seu malestar porque, asegura, estas probas non foron realizadas polo Servizo Galego de Saúde. Ademais, mantén o Goberno galego que soubo pola prensa destes novos positivos, o que implicaría "reincidir" no incumprimento dos protocolos en materia de comunicación de casos ás autoridades sanitarias. Pouco despois, Sanidade confirmou que os novos contaxiados non son cinco, senón seis, polo que o total de persoas afectadas pola COVID-19 na expedición do club sería xa de 12.

    Co medre do brote medran as opcións de que o plantel do Fuenlabrada permaneza na Coruña gardando corentena e, no caso dos positivos, en illamento ata que non superen a doenza. A Xunta xa subliñou que os gastos do aloxamento correrán a cargo da entidade deportiva.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza