A Agrupación Astronómica Coruñesa Ío impulsa a iniciativa Pechado por eclipse que anima a concellos, empresas e entidades con servizos non esenciais a considerar a adaptación temporal dos seus horarios
O vindeiro 12 de agosto non toda a poboación poderá ver a eclipse total de Sol. Algunhas persoas terán que estar traballando no período de tempo no que terá lugar o histórico fenómeno, que non se repetirá ata o ano 2180. A eclipse será visible en Galicia -con pequenas variacións entre unha e outra comarca- entre as sete e media e as nove e vinte da tarde, cun máximo preto das outo e media.
A Agrupación Astronómica Coruñesa Ío impulsa a iniciativa Pechado por eclipse que anima a concellos, empresas e entidades con servizos non esenciais a considerar a adaptación temporal dos seus horarios
A iniciativa tamén pretende "contribuír a unha mellor organización da mobilidade urbana durante esas horas, nas que se prevé unha importante afluencia de persoas a espazos abertos e miradoiros da cidade"
A proposta busca facilitar que "traballadores e cidadanía poidan vivir colectivamente un acontecemento natural pouco frecuente e de grande interese científico, educativo e cultural. Ademais de favorecer a participación cidadá na observación da eclipse, a iniciativa tamén pretende "contribuír a unha mellor organización da mobilidade urbana durante esas horas, nas que se prevé unha importante afluencia de persoas a espazos abertos e miradoiros da cidade".
A Agrupación Ío destaca que "esta medida permitiría transformar unha tarde singular nun momento colectivo de encontro coa ciencia, ao tempo que reforza a imaxe dunha cidade comprometida coa divulgación científica e coa cultura do coñecemento".
"Esta medida permitiría transformar unha tarde singular nun momento colectivo de encontro coa ciencia, ao tempo que reforza a imaxe dunha cidade comprometida coa divulgación científica e coa cultura do coñecemento"
A campaña ofrece distintas formas de participación, como adiantando a fin da xornada, establecendo un horario especial ou pechando durante un breve intervalo; tamén organizando unha observación colectiva e, igualmente, informando con antelación a clientes, provedores e persoas usuarias.
Para facilitar a comunicación da modificación temporal de horario, a Agrupación Astronómica Coruñesa Ío
facilita unha serie de materiais gráficos, que se poden descargar de balde dende o seu sitio web. No deseño destes materiais colaboraron Manel Cráneo, que realizou a imaxe identitaria e Marta Cortacans, que realizou o deseño gráfico da campaña.
Ademais, na web tamén se poden descargar documentos informativos para entidades públicas, empresas privadas e para entidades sociais e culturais. Nestes, a entidade sinala que "o importante non é a dimensión da medida, senón a vontade de facilitar que as persoas poidan vivir un momento excepcional".
