Decenas de persoas concentráronse este mércores ante a sede do Parlamento de Galicia en Santiago para esixir á Xunta de Galicia a resolución dos procesos selectivos de 2019 e que está "aínda sen finalizar".
Membros da Plataforma de Afectados OPE 2019, na que se inclúen persoas opositoras e traballadores públicos das especialidades de técnico en coidados auxiliares de enfermaría, bombeiro forestal, condutor de motobomba, emisorista e educadores e traballadores sociais, manifestáronse ante o que consideran unha situación "inaceptable".
"Logo de máis de catro anos de espera, pode dicirse que aínda non existen prazos para unha resolución destes procesos, e mentres tanto máis de 740 persoas seguen esperando poder traballar canto antes", lamentan desde a plataforma, que advirten de que a situación "é practicamente a mesma" que uns meses ou, se cadra, "peor".
Máis de 740 persoas están afectadas pola falta de resolución duns procesos selectivos de hai catro anos
"Os prazos e o tempo seguen correndo, chegando a un momento no que estes procesos selectivos antigos se solapan cos novos das mesmas especialidades, sendo a preparación destes obrigada ao non ter unha praza garantida de forma oficial nos xa celebrados anteriormente", argumentan.
Ademais, aseguran que "esta preparación obriga a paralizar a vida dun, pagar taxas e academias outra vez e dedicarse case en exclusiva de novo ao estudio". "Supón un esforzo totalmente inaceptable e que resulta fácil de evitar coa resolución duns procesos que xa van para cinco anos", aseguran.
"Moitas destas persoas está sen traballo e á espera na súa casa nunha situación verdadeiramente precaria, en traballos temporais agardando a resolución, ou simplemente preparando de novo unha oposición que xa ten aprobada, pero da que non ten os resultados polo desleixo da Xunta", isisten.
Así, desde a plataforma detallan que a resolución pendente afecta 305 prazas de auxiliares de enfermaría, 114 de bombeiro forestal, 80 de condutor de motobomba, 75 de emisorista, 86 de educación social e 81 prazas de traballo social.
"O parón da administración no verán e a clara falta de vontade para resolver estes procesos fai que todo se poida trasladar a outubro, finais de ano ou ao ano que vén", explican, polo que, ante esta situación, a plataforma valora a posibilidade de convocar concentracións semanais e acampar permanentemente en San Caetano como protesta.
