O tribunal ratifica a suspensión de funcións durante ano e medio a un docente tanto por falta inxustificada de rendemento como polo seu trato ao alumnado
O Tribunal Superior de Xustiza de Galicia (TSXG) divulgou este luns unha sentenza que avala a suspensión de funcións durante 18 meses e 15 días imposta pola Xunta a un funcionario de carreira do corpo de profesores de ensino secundario, con destino definitivo nun centro de Formación Profesional de Pontevedra, como autor responsable de dúas infraccións graves: unha por falta inxustificada de rendemento e outra por desconsideración grave a persoas coas que se relacionou no exercicio das súas funcións.
O TSXG tivo en conta un informe do Servizo de Inspección Educativa que indica que, ao longo dos cursos 2018-19 e 2019-20, o director do centro tivo que advertir ao recorrente, "de maneira verbal e en reiteradas ocasións", de que a súa actitude na aula e a respecto do alumnado, así como a súa práctica docente, "non eran as máis acertadas", xa que recibiran numerosas queixas do alumnado, as cales proseguiron nos cursos posteriores. Finalmente, o 17 de marzo de 2021 a Xunta adoptou o acordo de incoación do procedemento disciplinario contra o demandante e o 21 de decembro de 2021 ditou a resolución sancionadora.
A Xunta sancionou o profesor a finais de 2021 tras recibir numerosas queixas polo seu comportamento nos cursos 2018-19 e 2019-20
O castigo pola falta inxustificada de rendemento baseouse nos seguintes feitos: non informar ao alumnado da programación didáctica; impuntualidade; falta de explicación da materia; incoherencia en criterios de cualificación; os exames non demostraron a consecución dos obxectivos específicos; nalgúns exames figuran comentarios como "un desastre" ou "moi frouxo", sen realizar ningunha análise nin indicación; o único instrumento de avaliación era un exame por trimestre; non utilizou en ningún momento a aula virtual nin os medios dispostos pola Xunta; utilizou o WhatsApp como instrumento telemático; e non cumpriu coas instrucións recibidas por parte da Xefatura de Estudos.
![](https://praza.gal/storage/uploads/fp-9e41aa5.jpeg)
A Sala salienta que, tanto a través da proba testifical de, polo menos, oito alumnos e alumnas, e da declaración da xefa de estudos, quedou acreditado que o profesor "ausentábase habitualmente da aula sen xustificación durante as clases e deixaba só ao alumnado". Ademais, o TSXG destaca que quedaron debidamente acreditados "todos e cada un dos feitos en que se fundou a imputación de falta inxustificada de rendemento".
Canto aos feitos consistentes na desconsideración grave ao alumnado, o alto tribunal galego tamén entendeu probado o emprego de alcumes inapropiados "para referirse a moitos alumnos, ridiculizándoos e descualificándoos" co emprego de expresións como "Pokemon", "Miau", "Transformer" ou "drogadicto"; así como a utilización de contestacións desagradables, cortantes ou displicentes con algúns alumnos; o trato de favor respecto a algunhas alumnas polo seu aspecto físico e idade; o emprego de comentarios sexistas e insinuantes para referirse a algunhas das alumnas; a realización de preguntas innecesarias e persoais; a intervención nas conversas das mozas na aula; e comportamentos inapropiados, sen seguir as pautas pedagóxicas ás que está obrigado un docente.
O TSXG, deste xeito, rexeitou o recurso interposto polo profesor contra unha sentenza previa dun xulgado do contencioso-administrativo confirmara as dúas sancións. Os maxistrados explican que na resolución sancionadora "xustifícase a sanción imposta pola infracción grave de falta inxustificada de rendemento co argumento de que estamos ante condutas persistentes ás que debe imputarse un alto grao de culpabilidade, despois de que o inculpado foi advertido do incorrecto da súa conduta".
Respecto á sanción de suspensión de funcións de 11 meses imposta pola desconsideración grave cara aos alumnos, os maxistrados destacan que "igualmente concorre a intencionalidade, persistencia e dano aos intereses públicos e particulares dos alumnos". Os maxistrados destacan que os feitos imputados "refírense a condutas continuadas que se produciron ao longo dun curso académico, polo que non resulta imprescindible a especificación de datas".