Sanidade puxo en marcha un sistema de avisos para informar á cidadanía cando a temperatura mínima prevista sexa inferior á temperatura limiar de impacto na saúde e sitúa a Pontevedra no nivel dous, cun risco medio para a saúde por tempo frío
O frío intenso afecta negativamente á saúde, tanto de forma directa como indirecta. O Ministerio de Sanidade puxo en marcha un sistema de avisos para informar á cidadanía cando a temperatura mínima prevista sexa inferior á temperatura limiar de impacto na saúde. Así, a través dun algoritmo deseñado para identificar os momentos de risco, asignarán niveis de risco baixo, medio ou alto por provincias.
É posible subscribirse para recibir un aviso por correo electrónico ou por SMS, ademais de que se actualizará no sitio web do Ministerio. Estas medidas enmárcanse no Plan nacional de actuacións preventivas por baixas temperaturas 2024-2025, activo desde o 2 de decembro, que ten como obxectivo reducir o impacto sobre a saúde asociado ás baixas temperaturas e forma parte do Plan estratéxico de saúde e medio, elaborado por Sanidade xunto ao Ministerio para a Transición Ecolóxica e o Reto Demográfico.
Os limiares de temperaturas que impactan na saúde obtéñense analizando a asociación entre series temporais de mortalidade e temperatura a nivel provincial. Sanidade indica no mapa estatal catro niveles de risco: 0/ausencia de risco (gris), 1/baixo risco (azul claro), 2/risco medio (azul medio) e 3/alto risco (azul escuro).
A provincia de Pontevedra é a única do Estado que se atopa no nivel dous de risco medio. Neste momento, só está en risco alto Salamanca. Porén, varias zonas aparecen cun risco baixo de incidencia, entre elas Ourense.
O frío pode producir unha descompensación orgánica que agrave enfermidades crónicas na poboación vulnerable. O seu impacto na saúde pode ser mesmo superior ao da calor
Desde o Ministerio lembran que o frío pode producir unha descompensación orgánica que agrave enfermidades crónicas na poboación vulnerable. O seu impacto na saúde pode ser mesmo superior ao da calor, aínda que unicamente nos casos máis extremos as baixas temperaturas son causantes de efectos como a hipotermia ou a conxelación.
Ademais, durante o inverno prodúcense máis accidentes de tráfico e caídas por placas de xeo, así como incendios e intoxicacións por monóxido de carbono que teñen a súa orixe en estufas de gas ou braseros.
"Con maior frecuencia o frío conduce a un sobreestrés do organismo que pode dar lugar a unha descompensación orgánica que agrava enfermidades crónicas en poboación vulnerable. Aínda que este fenómeno pódese observar a partir dos indicadores de morbimortalidad por todas as causas, merece especial mención o seu efecto sobre as patoloxías de tipo cardíaco e respiratorio. Así mesmo, as baixas temperaturas poden aumentar a incidencia doutras complicacións de saúde, por exemplo, o aumento dos diagnósticos por depresión ou ansiedade e esquizofrenia, ou complicacións durante a xestación", detalla Sanidade.
