É Galicia máis insegura que hai uns anos? Cométense máis delitos? A resposta é non, á vista das estatísticas oficiais do Ministerio do Interior, que semellan desmontar as alarmas e críticas públicas lanzadas en moitos lugares por determinados partidos e medios de comunicación

É Galicia máis insegura que hai uns anos? Cométense máis delitos? A resposta é non, á vista das estatísticas oficiais do Ministerio do Interior, que semellan desmontar as alarmas e críticas públicas lanzadas en moitos lugares. O número de infraccións rexistradas polas forzas policiais aumenta lixeiramente, pero unicamente debido ao incremento dos ciberdelitos, especialmente das estafas informáticas. Pola contra, a criminalidade convencional (a máis visible publicamente e que adoita xerar a sensación de inseguridade nas rúas) descende.

Durante o pasado ano 2024 cometéronse en Galicia un total de 95.405 infraccións penais, a cifra máis alta da serie histórica, cun aumento do 0,6% en relación ao 2023. Porén, o que realmente aumentou foi o número de ciberdelitos (un 9,6% máis), que xa representan unha de cada catro infraccións, especialmente as estafas informáticas, máis de vinte mil o pasado ano Galicia. Se observamos unicamente os datos da criminalidade convencional (71.560 delitos), vemos que esta descendeu un 2,1% en 2024.

Se exceptuamos as estafas informáticas, a cifra total do resto de delitos cometidos en Galicia é moi semellante á que se rexistraba hai unha década e mesmo é inferior á dos período 2011-2013

Se ampliamos o foco e comparamos os datos actuais cos rexistrados durante toda a pasada década, vemos como -efectivamente- o número total de delitos é maior agora. Ata o 2019 a cifra total de infraccións penais movíase ao redor das 80 mil, moi por debaixo das 95 mil actuais.

Porén, se restamos destas cifras as correspondentes ás estafas informáticas, en crecemento na última década e disparadas dende o ano 2021, vemos que o resto de delitos (uns 75 mil o pasado ano) móvense en valores moi semellantes aos de hai dez anos (76.371 en 2014) e mesmo por debaixo dos que se rexistraban entre 2011 e 2013.

No 2024 descendeu en Galicia o número de delitos cometidos de practicamente todos os tipos penais. Reducíronse especialmente os roubos con violencia (-4,6%), os roubos en domicilios (-7,3%), os furtos (-3,3%), as subtraccións de vehículos (-6,9%) e os delitos relacionados co tráfico de drogas (-1,1%)

No 2024 descendeu en Galicia o número de delitos cometidos de practicamente todos os tipos penais. Agás o xa referido aumento da ciberciminalidade (+9,7%) e das estafas informáticas (+8,1%) e coa única excepcións na criminalidade convencional do aumento dos delitos de lesións (+7,2%), o resto de infraccións reduciu o seu número.

Cometéronse un 4,6% menos de roubos con violencia e intimidación e un 7,3% menos de roubos con forza en domicilios, establecementos e outras instalacións. De igual xeito, houbo un 3,3% menos de furtos e un 6,9% menos de subtraccións de vehículos. Caen tamén os delitos relacionados co tráfico de drogas (-1%).

Descendeu tamén o número de agresións sexuais con penetración (-10,5%), pasando de 201 a 180. É a primeira vez que descende a súa cifra dende o ano 2017 (coa excepción do ano 2020, marcado pola pandemia de COVID), despois de que o número de violacións se duplicase entre 2018 e 2023.

As estatísticas do pasado ano son moi semellantes ás que se rexistraban hai unha década, datos que contrastan co incremento dos discursos públicos ao redor do aumento da inseguridade nas rúas

Se botamos a vista atrás, aos datos de hai unha década (2015), vemos como os roubos con violencia e intimidación (1.070 en 2015, 1.001 en 2024) son practicamente os mesmos, ao igual que os roubos con forza en domicilios (4.235 en 2015, 4.358 en 2024). Descenden claramente as substraccións de vehículos a motor (de 980 a 540). E, pola contra, aumentan os delitos relacionados co tráfico de drogas (de 348 a 483). Tamén caen os furtos (de 22.038 a 19.622).

En definitiva, atopamos que as estatísticas do pasado ano son moi semellantes ás que se rexistraban hai unha década, datos que contrastan co incremento dos discursos públicos ao redor do aumento da inseguridade nas rúas.

Durante o ano 2024 o número de infraccións penais mantívose relativamente estable nas sete cidades galegas, mesmo con descensos en Vigo, Ourense e Lugo. Tan só en Santiago (+6%) e Pontevedra (+7,6%) as cifras medraron de forma clara

Estes discursos públicos resoan especialmente nalgunhas cidades. Fixérono hai uns anos na Coruña e fano na actualidade en Santiago ou en Lugo. Porén, de novo as cifras oficiais do Ministerio do Interior semellan desmentir a realidade da que falan algúns partidos políticos e medios de comunicación.

Durante o ano 2024 o número de infraccións penais mantívose relativamente estable nas sete cidades galegas, mesmo con descensos en Vigo, Ourense e Lugo. Tan só en Santiago (+6%) e Pontevedra (+7,6%) as cifras medraron de forma clara.

Santiago é unha das cidades nas que nos últimos tempos semella medrar unha maior sensación de inseguridade. Porén, a pesar de que o número total de delitos aumentou, en 2024 descendeu o número de furtos (-9,1%), de roubos con forza en domicilios (-23,6%) e dos delitos relacionados co tráfico de drogas (-46%)

En Vigo descenderon a maior parte de delitos, especialemente os roubos con violencia, en domicilios e tendas e tamén as substraccións de vehículos; si aumentaron as violacións (que pasaron nun ano de 36 a 47) e o tráfico de drogas (+8,8%). Na Coruña reducíronse tamén os roubos e furtos, pero aumentaron as substraccións de vehículos (de 36 a 65). Algo semellante sucedeu en Lugo, cunha caída da maior parte das infraccións, agás dos roubos en coches.

Santiago é unha das cidades nas que nos últimos tempos semella medrar unha maior sensación de inseguridade. Porén, a pesar de que o pasado ano o número total de delitos cometidos na capital de Galicia si aumentou, as estatísticas do Ministerio do Interior revelan que en 2024 descendeu claramente o número de furtos (-9,1%), de roubos con forza en domicilios e establecementos (-23,6%) e dos delitos relacionados co tráfico de drogas (-46%). Si aumentaron as substraccións de vehículos, que se duplicaron, pasando de 17 a 38.