O xurado salienta o "uso de fontes coas que resulta fácil a identificación, á par doutras máis profesionais que poden afondar na cuestión que se analiza sen ser superficial"
- REPORTAXE | Non estamos ben en internet
A xornalista Raquel C. Pico vén de gañar o XXX Premio Xornalístico Manuel Reimóndez Portela coa reportaxe Non estamos ben en internet publicada en VINTE, revista de sociedade, cultura e tendencias editada, como Praza.gal, pola Fundación Praza Pública. O xurado do premio salienta que a reportaxe "aborda o impacto que ten a hiperconexión do mundo actual na saúde mental e no benestar emocional, ademais de reflectila coma un novo elemento de presión no entorno laboral".
O xurado desta edición estivo conformado por Lois Docampo Míguez, David Cofán Mazás, Ana Cela Neira, Yuri Carrazoni Mier, Juan Andrés Fernández Castro e María Victoria Reimóndez Sanmartín. Na súa deliberación analizaron 21 candidaturas e elixiron a reportaxe de Raquel C. Pico por afrontar "temas de total actualidade ofrecendo enfoques diferentes, facendo uso de fontes coas que resulta fácil a identificación, á par doutras máis profesionais que poden afondar na cuestión que se analiza sen ser superficial".
A reportaxe publicada en VINTE, di o xurado, "ofrece unha lectura amena que conecta co lector dende o primeiro parágrafo, introducindo o paradoxo de que na era da información o principal perigo é a desinformación, reivindicando como antídoto un xornalismo lento e reflexivo".
O premio xornalístico para traballos en galego que se vén convocando na Estrada desde hai 30 anos lembra a figura de Manuel Reimóndez Portela (A Estrada, 1916-1994), médico e político que presidiu pola UCD a comisión que elaborou o coñecido como Estatuto dos 16, anteproxecto elaborado en 1979 do Estatuto de Autonomía finalmente aprobado en 1981. Reimóndez Portela con varios libros escritos sobre a súa vila e o seu patrimonio cultural, tamén foi alcalde da Estrada nos anos oitenta.
Raquel C. Pico é colaboradora habitual de VINTE e xa gañou o Premio Reimóndez Portela en 2016, naquel momento coa reportaxe Descubrindo á esquecida "Marquesa Roja".
